ޖަލުތަކުގެ ޖާގަ އިތުރުކުރުމަށްޓަކައި ކުރެވެމުންދާ މަސައްކަތްތަކުގެ ތެރެއިން މިހާތަނަށް 400 އެއްހާ ޖާގަ އިތުރުކުރެވިފައިވާ ކަމަށް ކޮމިޝަނަރ އޮފް ޕްރިޒަންސް (ސީޕީ) ޙަސަން ޒަރީރު ވިދާޅުވެއްޖެއެވެ.
ސީޕީ ޒަރީރު މިހެން ވިދާޅުވީ މޯލްޑިވްސް ކަރެކްޝަނަލް ސަރވިސްއިން ކުރިއަށްގެންދިޔަ "އިންޑަކްޝަން ޓްރޭނިންގ ޕްރޮގްރާމް" ގެ ދަސްވެނިވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ. މި ރަސްމިއްޔާތުގައި ވާހަކަދައްކަވަމުން ކޮމިޝަނަރ ވިދާޅުވީ، 400 އެއްހާ ޖާގަ މިހާރު އިތުރުކުރެވިފައިވީ ނަމަވެސް، ކައިރި މުސްތަޤްބަލެއްގައި އިތުރު 300 ޖާގަ އިތުރު ނުކުރެވިއްޖެނަމަ ބޮޑެތި ދަތިތަކަކާ ކުރިމަތިލާން ޖެހިދާނެ ކަމަށެވެ.
މީގެ އިތުރުން ސީޕީ ފާހަގަކުރެއްވި ގޮތުގައި، ދޫނިދޫ ޖަލާއި މާލޭ ޖަލު ބަންދުކުރުމަށްފަހު އެ ގެއްލުނު ގޮޅިތަކުގެ ޖާގައަށް އެކަށީގެންވާ ޙައްލެއް ނުހޯދެނީސް 520 އަށްވުރެ ގިނަ މީހުން ޖަލުތަކުގައި ބަންދުކުރަން ޖެހިފައިވެއެވެ. އޭގެ ސަބަބުން ޖަލުތަކުގެ ޖާގައިގެ ދަތިކަން އިތުރުވެ، ޤާނޫނުގައި ލާޒިމްކުރާ ރޭޝިއޯއަށްވުރެ އޮފިސަރުން މަދުވުމުގެ ސަބަބުން މިހާރު ތިބި އޮފިސަރުންނަށް ބުރަ ބޮޑުވެގެން ގޮސްފައިވާ ކަމަށްވެސް އެމަނިކުފާނު ވިދާޅުވިއެވެ.
އޮފިސަރުންގެ ދަތިކަން ޙައްލުކުރުމަށްޓަކައި މަސައްކަތްތަކެއް ކުރެވެމުންދާކަން ފާހަގަކުރައްވަމުން، ދަސްވެނިވި 10 ކުދިންގެ އިތުރުން މިހާރުވެސް މާފުށީ ޖަލުގައި އިތުރު އޮފިސަރުންތަކެއް ތަމްރީނު ހާސިލުކުރަމުންދާ ކަމަށް ކޮމިޝަނަރ ވިދާޅުވިއެވެ. އަދި އޮފިސަރުން ތަމްރީނުކުރުމަށާއި ޤައިދީން އިސްލާހުކުރުމަށް އިންސްޓިޓިއުޓް ފޮރ ކަރެކްޝަނަލް ސްޓަޑީޒް (އައިކޯސްޓް) އިން ކުރަމުންދާ މަސައްކަތްތަކަށް ތައުރީފު ކުރައްވަމުން، މިހާރުވެސް 200 އެއްހާ އޮފިސަރުންނާއި މުވައްޒަފުން "ޑިޕްލޮމާ އިން ކަރެކްޝަނަލް މެނޭޖްމަންޓް" ކިޔަވަމުންދާކަން ހާމަކުރެއްވިއެވެ.
ސީޕީ އިތުރަށް ވިދާޅުވީ، ޕްރިޒަން އޮފިސަރުންނާއި ސިވިލް މުވައްޒަފުން އަދާކުރައްވަނީ ވަރަށް މުހިންމު އަދި ބުރަ ޤައުމީ ވާޖިބެއް ކަމަށެވެ. އަދި 55 އަހަރުވީ މި ޚިދުމަތް، 2013 ގައި ޤާނޫނު ވުޖޫދުވެގެން ސިވިލް ސަރވިސްއިން ވަކި ޚިދުމަތަކަށް ބަދަލުވެ ތަރައްޤީވެފައިވީ ނަމަވެސް، ކަރެކްޝަންސްގެ މަސައްކަތްތައް އެންމެ ބޭނުންވާ މިންވަރަށް އަދިވެސް ޒަމާނީ ވެފައިނުވާ ކަމަށް ވިދާޅުވިއެވެ.
ޕްރިޒަން އޮފިސަރުންނަކީ ސިފައިންނާއި ފުލުހުން ފަދައިން ޤައުމަށްޓަކައި ޚިދުމަތްކޮށް ފުރާނައިން ޤުރުބާންވާނެ ކަމަށް ހުވާކޮށްގެން ތިބޭ ބައެއްކަން ފާހަގަކުރައްވައި، ޒަމާނީ ވަސީލަތްތައް މަދު ނަމަވެސް ޖަލަށް ވެއްދުން މަނާތަކެތި ހުއްޓުވުމަށް އޮފިސަރުން ކުރަމުންދާ މަސައްކަތްތަކާއި އެ ފަރާތްތަކުގެ ހިތްވަރާއި ހީވާގިކަމަށް ސީޕީ ވަނީ ޝުކުރު އަދާކުރައްވާފައެވެ. އަދި އެންމެހާ އޮފިސަރުންނާއި މުވައްޒަފުންވެސް ތެދުވެރިކަމާއި ނަޒާހަތްތެރިކަން ދެމެހެއްޓެވުމަށް އެމަނިކުފާނު ނަސޭހަތްތެރިވެވަޑައިގެންނެވިއެވެ.
މޯލްޑިވްސް ކަސްޓަމްސް ސަރވިސްގެ ކޮންފަރަންސް ހޯލުގައި ބޭއްވި މި ރަސްމިއްޔާތު ޝަރަފްވެރިކޮށްދެއްވީ މޯލްޑިވްސް އިމިގްރޭޝަންގެ ކޮންޓްރޯލަރ ޖެނެރަލް، ކޮމިޝަނަރ އޮފް ޕޮލިސް (ރިޓަޔަރޑް) އަޙްމަދު ފަސީޙުއެވެ. މި ރަސްމިއްޔާތުގައި ސީޕީ ޙަސަން ޒަރީރުގެ އިތުރުން، އިންސްޕެކްޓަރ އޮފް ކަރެކްޝަނަލް ސަރވިސް އަލްއުސްތާޛާ ޢާއިޝަތު ޝިއުނާ، ހައިކޯޓުގެ ފަނޑިޔާރު އަލްއުސްތާޛް އިސްމާޢީލް ޝަފީޢު، އިމިގްރޭޝަންގެ ވަގުތީ މާލީ ޒިންމާދާރުވެރިޔާ އަޙްމަދު ވަޙީދު، އައިކޯސްޓުގެ ޑިރެކްޓަރ އަޙްމަދު ލުޤްމާން އަދި ޖަލުތަކުގެ ޑައިރެކްޓަރުންނާއި ކޮމިޝަންޑް އޮފިސަރުންނާއި ދަސްވެނިންގެ ޢާއިލާތަކުން ބައިވެރިވެވަޑައިގެންނެވިއެވެ.
މި ލިޔުން ކިޔާލުމުން
