އދ. ގެ ސަލާމަތީ މަޖިލިސް އިސްލާޙުކުރުމަށާއި، ފަލަސްޠީނަކީ މިނިވަން ދައުލަތެއްގެ ގޮތުގައި ބަލައިގަތުމަށް ތުރުކީވިލާތުގެ ރައީސް ރަޖަބް ޠައްޔިބު އުރުދުޣާން ގޮވާލައްވައިފިއެވެ. އެމަނިކުފާނު މިކަމަށް ގޮވާލެއްވީ އަންގާރަ ދުވަހު ބޭއްވުނު އދ. ގެ ޢާންމު މަޖިލީހުގެ ޖަލްސާގައި ތަޤްރީރު ކުރައްވަމުންނެވެ.
ރައީސް އުރުދުޣާންގެ ވާހަކަފުޅުގައި، ދުނިޔޭގެ ޞުލްޙަ ބެލެހެއްޓުމުގެ ވާޖިބު އަދާކުރުމަށް އދ. ނުކުޅެދިފައިވާ ކަމަށް ވިދާޅުވިއެވެ. އަދި ސަލާމަތީ މަޖިލީހަކީ އެންމެންގެ ބައިވެރިވުން މިއަށްވުރެ ފުޅާ ދާއިރާއެއްގައި އޮންނަ ތަނަކަށް ހެދުމަށް އެމަނިކުފާނު ވަނީ ބާރުއަޅުއްވާފައެވެ. މިއީ އުރުދުޣާން މިފަދައިން ގޮވާލައްވާތާ އަހަރުތަކެއް ވެފައިވާ ކަމެކެވެ.
އދ. ގެ މިހާރުގެ އޮނިގަނޑަށް ފާޑުވިދާޅުވަމުން އެމަނިކުފާނު ވިދާޅުވީ، "190 އަށް ވުރެ ގިނަ ޤައުމުގެ އިޚްތިޔާރު، ފަސް ޤައުމެއްގެ ހިތުހުރި ގޮތަކަށް ދޫކޮށްލެވިފައިވާ ނިޒާމަކީ އިންޞާފުވެރި ނިޒާމެއް ނޫން ކަމަށާއި، އެއީ ފުރިހަމައަށް އިތުބާރު ޤާއިމުކުރެވޭނެ ނިޒާމެއް ނޫން ކަމަށް އަޅުގަނޑުމެން އެއްބަސްވަމާ ހިންގަވާ" ކަމަށެވެ. އަދި ޞުލްޙައާއި އަމަންއަމާންކަން ދެމެހެއްޓުމަށް 81 އަހަރު ކުރިން އުފެއްދި އދ. އަށް މިއަދު އެ މަސްއޫލިއްޔަތު އަދާނުކުރެވޭ ހިސާބަށް ގޮސްފައިވާ ކަމަށްވެސް ވިދާޅުވިއެވެ.
ޣައްޒާގެ ހާލަތާ ގުޅޭގޮތުން ވާހަކަދައްކަވަމުން، އުރުދުޣާން ވަނީ އެތަނުގައި ހިނގަމުންދާ ކަންކަމަށް އިންސާނިއްޔަތުކަމާއި އޯގާތެރިކަން ހުރި އެއްވެސް މީހަކަށް ލޯ މަރާލައިގެން ނުތިބެވޭނެ ކަމަށް ވިދާޅުވެފައެވެ. އަދި ޣައްޒާގެ ހަނގުރާމައަކީ "އަޅުގަނޑުމެންގެ ޒަމާނުގެ އެންމެ ލާއިންސާނީ، އެންމެ ލަދުވެތި ކޮންސެންޓްރޭޝަން ކޭމްޕް" ގެ ގޮތުގައި ސިފަކުރައްވައި، ހަނގުރާމަ ހުއްޓުވުމަށް އިސްރާއީލަށް ކުރާ ޕްރެޝަރު އިތުރުކުރުމަށް ގޮވާލެއްވިއެވެ.
މީގެއިތުރުން، ފަލަސްޠީނުގެ ރައީސް މަޙްމޫދު ޢައްބާސް އަށް ވިދިވިދިގެން ދެ އަހަރު އެ މާލަމުން ޖާގަ ލިބިވަޑައިގެންފައި ނުވާކަން ފާހަގަކުރައްވައި، އެއީ ފަލަސްޠީނުގެ ރައްޔިތުންނާ މެދު ހިންގާ ބޮޑު ބޭއިންޞާފެއް ކަމަށް ވިދާޅުވިއެވެ. އަދި ފަލަސްޠީނަކީ ދައުލަތެއްގެ ގޮތުގައި ބަލައިނުގަންނަ ޤައުމުތަކުން އެ ނިންމުން މުރާޖަޢާ ކުރުމަށްވެސް އިލްތިމާސްކުރެއްވިއެވެ.
ނޭޓޯގެ މެންބަރު ޤައުމެއް ކަމަށްވާ ތުރުކީއަކީ އިސްރާއީލުން ޣައްޒާއަށް ދެމުންދާ ޙަމަލާތަކަށް އެންމެ ބޮޑަށް ފާޑުކިޔަމުންދާ އެއް ޤައުމެވެ. އެ ޙަމަލާތަކަކީ ނަސްލުހޭދުކުރުން ކަމަށް ތުރުކީން ސިފަކޮށް، އިސްރާއީލާ ދެކޮޅަށް ބައިނަލްއަޤްވާމީ ފިޔަވަޅުތައް އެޅުމަށް ތަކުރާރުކޮށް ވަނީ ގޮވާލާފައެވެ. ނަމަވެސް އިސްރާއީލުން މި ތުހުމަތުތައް ދޮގުކުރެއެވެ.
މި ލިޔުން ކިޔާލުމުން
