އެމެރިކާއިން އަލަށް އެޅި ދަތިކުރުމުގެ ފިޔަވަޅުތަކާ ގުޅިގެން ބައިނަލްއަޤްވާމީ އެއާލައިންތަކާއި އަވަށްޓެރި ޤައުމުތަކުން އީރާނުގެ އެއާލައިންތަކާ އޮތް ގުޅުން ކަނޑާލަން މަޖުބޫރުވުމުން، އީރާނުގެ ރައްޔިތުންނަށް ދަތުރުފަތުރުކުރުމުގައި ބޮޑެތި ދަތިތަކަކާ ވަނީ ކުރިމަތިލާން ޖެހިފައެވެ.
އީރާނުގެ އެއާލައިންތަކަށް ޚިދުމަތް ދިނުމަށް ލިބުނު މުހުލަތު ހަމަވުމާ ގުޅިގެން، ތުރުކީވިލާތް، ޔޫއޭއީ އަދި ޗައިނާއަށް ކުރަން ހަމަޖެހިފައި އޮތް ގާތްގަނޑަކަށް ހުރިހާ ފްލައިޓެއް މިހާރު ވަނީ ކެންސަލްކޮށްފައެވެ.
އޮމާން، އަޒަރުބައިޖާން އަދި ޖޯޖިއާއިން އީރާނުގެ އެއާލައިންތަކަށް ޚިދުމަތް ދިނުން ހުއްޓާލާފައިވާއިރު، އިރާޤުގެ ނަޖަފަށް ދަތުރުތައް ކުރިއަށްދިޔަ ނަމަވެސް ބަޣުދާދުގެ އެއާޕޯޓް ވަނީ އީރާނުގެ އެއާލައިންތަކަށް އެއްކޮށް ބަންދުކޮށްފައެވެ.
ވައިގެ ދަތުރުތަކަށް އެޅުނު މި ހުރަހުގެ ސަބަބުން އެތައް ހާސް ބަޔަކު އެއްގަމު މަގު އިޚްތިޔާރުކުރަން މަޖުބޫރުވެ، ތުރުކީ އަދި އަރުމީނިއާ ބޯޑަރުތައް ތޮއްޖެހިފައިވާއިރު، ތުރުކީއަށް ދާ ބަސް ޓިކެޓްގެ އަގު ވަނީ ހަތަރު ގުނަ އުފުލިފައެވެ.
އަވަށްޓެރި ޤައުމުތަކުން އެއްބަސްވެގެން އީރާނުގެ އެއާލައިންތަކަށް ޚިދުމަތް ދިނުމަށް އިންކާރުކުރުމަކީ ދަތިކުރުމުގެ ފިޔަވަޅުތައް އަމަލީ ގޮތުން ތަންފީޒުކުރުމުގެ އައު ލެވެލްއެއް ކަމަށް އޭވިއޭޝަން ތަޖުރިބާކާރު މުޙައްމަދު ރިޟާ އިބްރާހީމްޕޫރު ވަނީ ފާހަގަކުރައްވާފައެވެ.
ކުރީގެ ފިޔަވަޅުތަކުގެ ސަބަބުން ވައިގެ ސަރަޙައްދު ބޭނުންކުރުމުގެ ފީގެ ގޮތުގައި އަހަރަކު ލިބެންޖެހޭ 300 މިލިއަނަށް ވުރެ ގިނަ ޑޮލަރު އީރާނަށް ގެއްލެމުންދާއިރު، މި ފަހަރުގެ ފިޔަވަޅުތަކުގެ ސަބަބުން ދިގު މުއްދަތަކަށް ދެމިގެންދާނެ ނޭދެވޭ އަސަރުތަކެއް ކޮށްފާނެ ކަމަށް އޭނާ އިންޒާރު ދެއްވިއެވެ.
މި ލިޔުން ކިޔާލުމުން
