އިންޑިއާ ސަރުކާރުގެ އެހީތެރިކަމާއެކު ރާއްޖެއަށް ދިނުމަށް ހަމަޖެހިފައިވާ 48.50 ބިލިއަން އިންޑިއަން ރުޕީސް (ގާތްގަނޑަކަށް 506.58 މިލިއަން ޑޮލަރު) ގެ ކްރެޑިޓް ލައިނަށް ޢަމަލުކުރަން ފަށާފައިވާކަން ރިޒާވް ބޭންކް އޮފް އިންޑިއާ އިން ހާމަކޮށްފިއެވެ. ރޮއިޓާސްއިން ރިޕޯޓުކޮށްފައިވާ ގޮތުގައި، މި ނިންމުމާއެކު ރާއްޖޭގައި ހިންގުމަށް ހަމަޖެހިފައިވާ ތަރައްޤީގެ ތަފާތު މަޝްރޫޢުތަކަށް ފައިސާ ދޫކުރުމުގެ އެއްބަސްވުންތަކުގައި ސޮއިކުރުމުގެ މަގު މިހާރު ވަނީ ތަނަވަސްވެފައެވެ.
އާރްބީއައިއާ ހަވާލާދީ މީޑިއާތަކުން ބުނެފައިވާ ގޮތުގައި، މި ކްރެޑިޓް ލައިންގެ ދަށުން ފައިސާ ދޫކުރުމަށް ހަމަޖެހިފައިވަނީ މަދުވެން 5 ބިލިއަން ރުޕީސްގެ އަގުހުރި ވަކިވަކި މަޝްރޫޢުތަކަށެވެ. އަދި މި އެއްބަސްވުމުގެ ދަށުން ހިންގާ ކޮންޓްރެކްޓްތަކަށް ބޭނުންވާ މުދަލާއި، މަސައްކަތްތަކާއި، ޚިދުމަތްތަކުގެ މަދުވެގެން 75 އިންސައްތަ ފޯރުކޮށްދޭންޖެހޭނީ އިންޑިއާގެ ވިޔަފާރިވެރިންނެވެ. ބާކީ 25 އިންސައްތަ އިންޑިއާއިން ބޭރުގެ ފަރާތްތަކުން ހޯދުމުގެ ފުރުޞަތު އޮތްނަމަވެސް، މި ޝަރުތުގެ ސަބަބުން އިންޑިއާގެ މުދަލާއި ޚިދުމަތްތަކަށް އޮންނަ ޑިމާންޑް އިތުރުވެގެންދާނެއެވެ. މީގެއިތުރުން، އެކްސްޕޯޓް ކުރުމުގައި ދޭ އޭޖެންސީ ކޮމިޝަން ދިނުމަށް މި ފައިސާ ބޭނުންކުރުން އާރްބީއައިއިން ވަނީ މަނާކޮށްފައެވެ. ނަމަވެސް، އެކްސްޕޯޓަރުންގެ އަމިއްލަ ފައިސާއިން ނުވަތަ އެކްސްޗޭންޖް އާނާސް ފޮރިން ކަރަންސީ އެކައުންޓްގައި ހުރި ފައިސާއިން އެފަދަ ކޮމިޝަންތައް ދެއްކިދާނެއެވެ.
އާރްބީއައިގެ ސާކިއުލާގައިވާ ގޮތުން، 1 ޑޮލަރަށް 95.7400 އިންޑިއާ ރުޕީސްގެ އެކްސްޗޭންޖް ރޭޓެއް ބޭނުންކުރާ މި ފެސިލިޓީގެ ދަށުން ފައިސާ ދޫކުރެވޭނެ އެންމެ ފަހުގެ ތާރީޚަކީ ކޮންޓްރެކްޓް ނިމޭނެކަމަށް ކަނޑައަޅާ ތާރީޚުން ފެށިގެން 48 މަސްދުވަހުގެ ނިޔަލަށެވެ. މި ކްރެޑިޓް ލައިނަކީ 25 ޖުލައި 2025 ގައި، އެ އަހަރުގެ މިނިވަން ދުވަހާ ގުޅުވައިގެން އިންޑިއާގެ ބޮޑުވަޒީރު ނަރެންދުރަ މޯދީ ރާއްޖެއަށް ކުރެއްވި ރަސްމީ ދަތުރުފުޅުގެ ތެރޭގައި އެކްސްޕޯޓް-އިމްޕޯޓް ބޭންކް އޮފް އިންޑިއާ (އެގްޒިމް ބޭންކް) މެދުވެރިކޮށް ހަމަޖައްސައިދެއްވި ފެސިލިޓީއެކެވެ.
މިއާއެކު، ރާއްޖޭގެ ބަޖެޓު ސަޕޯޓަށް ކުރީގެ ރައީސް އިބްރާހީމް މުޙައްމަދު ޞާލިޙުގެ ވެރިކަމުގައި ސްޓޭޓް ބޭންކް އޮފް އިންޑިއާ މެދުވެރިކޮށް ނަގާފައިވާ 150 މިލިއަން ޑޮލަރުގެ ލޯނު މި ސަރުކާރުން މިހާރު ވަނީ އެއްކޮށް ދައްކައި ޚަލާޞްކޮށްފައެވެ. މީގެ ތެރެއިން އެންމެ ފަހުން ދައްކަންޖެހޭ 50 މިލިއަން ޑޮލަރު ދިވެހި ސަރުކާރުން ދައްކާފައިވަނީ ނިމިދިޔަ ހަފުތާގެ ތެރޭގައެވެ.
މި ލިޔުން ކިޔާލުމުން
