ހޮރްމުޒް ކަނޑުއޮޅި އަލުން ހުޅުވައި، ހަނގުރާމަ ހުއްޓާލުމަށް އީރާނުން ހުށަހެޅި ސުލްޙައިގެ ހުށަހެޅުން ބަލައިނުގަންނަވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވުމާ ގުޅިގެން، އެމެރިކާއާއި އިސްރާއީލާއެކު އޮތް ހަމަނުޖެހުންތަކަށް އޮތް ހަމައެކަނި ޙައްލަކީ ޑިޕްލޮމެސީ ކަމަށް އީރާނުގެ ޚާރިޖީ ވަޒީރު އައްބާސް އަރަޤްޗީ ވިދާޅުވެއްޖެއެވެ.
އަރަޤްޗީ ފާހަގަކުރެއްވި ގޮތުގައި ހޮރްމުޒް ކަނޑުއޮޅި އަލުން ހުޅުވޭނީ އީރާނުގެ ސާފު ޝަރުޠުތައް ފުރިހަމަވެގެންނެވެ. އަދި އދ. ގެ ޢާންމު މަޖިލީހުގައި އިޢުލާނުކޮށް، ޤަޠަރު މެދުވެރިކޮށް އެމެރިކާއަށް ހުށަހެޅި މި މައްސަލައިން އެމެރިކާއަށް ނިކުމެވޭނީ މަޝްވަރާކޮށްގެން ހޯދޭ ޙައްލަކުން ކަމަށްވެސް އޭނާ ވިދާޅުވިއެވެ.
ރައީސް ޓްރަމްޕް ވިދާޅުވެފައިވަނީ އީރާނުން އެއްބަސްވުމަކަށް މަސައްކަތް ކުރަނީ ހަނގުރާމައިގައި ބަލިވަމުންދާތީ ގޮތްހުސްވެގެން ކަމަށެވެ. ނަމަވެސް މި ޕްލޭން އެމެރިކާއިން ރަސްމީކޮށް ބަލައިނުގަންނަކަން މެދުވެރިން އީރާނަށް އަންގާފައި ނުވާތީ، އީރާނުން ގޮތެއް ނިންމާނީ މެދުވެރިންގެ ފަރާތުން ސާފު ނިންމުމެއް ލިބުމުން ކަމަށް ޚާރިޖީ ވަޒީރު އަރަޤްޗީ ވިދާޅުވިއެވެ.
ވޯލް ސްޓްރީޓް ޖާނަލްގެ ރިޕޯޓްގައިވާ ގޮތުން، އީރާނުން އެމެރިކާގެ ޝަރުޠުތައް ފުރިހަމަކުރާނެ ކަމާމެދު ޓްރަމްޕް ޝައްކުކުރައްވާ ކަމަށާއި، ނޮވެމްބަރު މަހުގެ މިޑްޓާމް އިންތިޚާބަށްފަހު އަލުން ބޮންއެޅުމުގެ ކެމްޕޭނެއް ފެށުމަކީ އެކަށީގެންވާ ކަމެއް ކަމަށް ޓްރަމްޕް ވިދާޅުވެފައިވެއެވެ.
ހަތް މަސްވީ ހަމަނުޖެހުމުގެ ސަބަބުން ކަނޑުގެ މުހިންމު މަގަކުން ތެޔޮ ދައުރުވުމަށް ހުރަސްއެޅި، ދުނިޔޭގެ އިޤްތިޞާދަށް ވަނީ ބޮޑެތި ގެއްލުންތަކެއް ލިބިފައެވެ. މި މައްސަލައިގައި އީރާނުން ސަޢޫދީ ޢަރަބިޔާއާއެކު ވެސް މަޝްވަރާކޮށްފައިވާއިރު، ހުށަހަޅާފައިވާ އެއްބަސްވުމުގެ ދަށުން ކަނޑުއޮޅި އަލުން ހުޅުވުމަށާއި ހަނގުރާމަ މެދުކަނޑާލުމަށް ހަތް ދުވަހުގެ މުއްދަތެއް ލިބޭނެ ކަމަށް އީރާނުން ބުނެއެވެ.
އެމެރިކާއިން ސުލްޙައިގެ އެއްބަސްވުން ޤަބޫލުކުރި ނަމަވެސް، ޔޫރޭނިއަމް މުއްސަނދިކުރުން ފަދަ ނިއުކްލިއާ ޕްރޮގްރާމާ ގުޅޭ ކަންކަމުގައި ދޫނުދޭނެ ކަމަށް އީރާނުގެ އިސް އޮފިޝަލަކު ވަނީ ވިދާޅުވެފައެވެ. އަދި އީރާނުގެ ރައީސް މަސްއޫދު ޕެޒެޝްކިއަން ވެސް ވިދާޅުވީ ތެހެރާނުން މަޝްވަރާއަށް ތައްޔާރު ކަމަށާއި، ނަމަވެސް ބިރުދެއްކުމާއި މަޖުބޫރުކުރުމުގެ ކުރިމަތީގައި ދޫނުދޭނެ ކަމަށެވެ.
މި ލިޔުން ކިޔާލުމުން
