ކުރީގެ މަޝްވަރާތަކަށްފަހު ވެސް ހަމަލާތަކާއި ދަތިކުރުމުގެ ފިޔަވަޅުތައް ކުރިމަތިވުމުގެ ސަބަބުން، އެމެރިކާއާއެކު ކުރާ މަޝްވަރާތަކަށް ދެން އިތުބާރު ނުކުރާނެ ކަމަށް އީރާނުގެ ރައީސް މަސްޢޫދު ޕެޒެޝްކިއާން ވިދާޅުވެއްޖެއެވެ.
ރައީސް ޕެޒެޝްކިއާން ވިދާޅުވީ އެމެރިކާއަށް އެއްވެސް އިތުބާރެއް ނެތް ކަމަށާއި، އެމީހުންނާއެކު އެއްބަސްވުމަކަށް އާދެވޭނެ އަސާސެއް ނޭނގޭ ކަމަށެވެ. އަދި ގަތަރާއި ޕާކިސްތާނު މެދުވެރިކޮށް އީރާނުގެ މެސެޖުތައް ފޮނުވަމުންދާއިރު، މި ވާހަކަތައް ބިނާވެފައިވަނީ ޖޫން މަހުގެ ފަހުމުނާމާގެ މައްޗަށް ކަމަށާއި އެ އެއްބަސްވުމާމެދު އެމެރިކާ ދެކޭގޮތް ސާފުވާންޖެހޭ ކަމަށްވެސް އެމަނިކުފާނު ފާހަގަކުރެއްވިއެވެ.
އދ. ގެ ބައްދަލުވުމުގެ ތެރެއިން އީރާނުގެ ރައީސް މަސްޢޫދު ޕެޒެޝްކިއާން އަދި ޚާރިޖީ ވަޒީރު އައްބާސް އަރާގްޗީ ވަނީ ހަނގުރާމަ ހުއްޓުވައި ހަތް ދުވަހުގެ ތެރޭގައި ހޮރްމުޒް ކަނޑުއޮޅި ހުޅުވާލުމުގެ އެއްބަސްވުމެއް އެމެރިކާއަށް ހުށަހަޅުއްވާފައެވެ. އަރާގްޗީ ވިދާޅުވި ގޮތުގައި ފުރަތަމަ ފިޔަވަޅުތަކަށް ހަތަރެއް ނުވަތަ ފަސް ދުވަސް ނަގާނެ ކަމަށާއި، ހަވަނަ ދުވަހު ކަނޑުއޮޅި ހުޅުވާލުމަށްފަހު ހަތްވަނަ ދުވަހު ނިއުކްލިއާ ޕްރޮގްރާމް ހިމެނޭހެން ދާއިމީ އެއްބަސްވުމެއްގެ ވާހަކަތައް ފެށޭނެއެވެ.
މި ޕްލޭނުގެ ދަށުން އީރާނުގެ ބަނދަރުތައް އެމެރިކާއިން ބަންދުކޮށްފައި އޮތް އޮތުމާއި ތެޔޮ ވިއްކުމުގެ ދަތިކުރުމުގެ ފިޔަވަޅުތައް އުވާލައި، ފްރީޒްކޮށްފައިވާ 12 ބިލިއަން ޑޮލަރު ދޫކޮށްލުމުގެ އިތުރުން މުޅި ސަރަހައްދަށް ހަނގުރާމަ ހުއްޓާލުން ގެންނަން ޖެހެއެވެ. އަދި ކަނޑުއޮޅި ބަންދުކުރީ އެމެރިކާގެ ފިޔަވަޅުތަކުގެ ރައްދެއްގެ ގޮތުން ކަމަށާއި، މަޝްވަރާއިން ހައްލު ލިބުމުން އެތަން އަލުން ހުޅުވާނެ ކަމަށް ޕެޒެޝްކިއާން ވިދާޅުވިއެވެ.
ޕެޒެޝްކިއާން ވިދާޅުވީ މި ހަމަނުޖެހުމުގައި އިސްވެ ހަމަލާދިނީ އެމެރިކާއިން ކަމަށާއި ފާއިތުވި 200 އަހަރު ތެރޭ އީރާނުން އެއްވެސް ގައުމަކަށް ހަމަލާދީފައި ނުވާނެ ކަމަށެވެ. އަދި އީރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް ޣައްޒާގެ ނަސްލުހޭދު ކުރުމުގެ އަމަލުތަކާ އެއްފަދަކުރައްވަމުން، ސަރަޙައްދީ ސަލާމަތަށް ވަކި ފުލުހެއް ބޭނުން ނުވާ ކަމަށާއި ޔަމަނުގެ މައްސަލަ ހައްލުކުރުމަށް ސަޢޫދީ އަރަބިއްޔާއާއި ހޫޘީން ގުޅިގެން މަސައްކަތްކުރުމަށް ގޮވާލެއްވިއެވެ.
އެތެރޭގެ ސިޔާސީ މަސްރަޙާ ގުޅޭގޮތުން ވާހަކަދައްކަވަމުން، ދުޝްމަނުންގެ މަސައްކަތްތަކާއެކު ވެސް ގައުމުން ފެންނަނީ ވަރުގަދަ އެއްބައިވަންތަކަމެއް ކަމަށާއި، އެންމެ މަތީ ވެރިޔާ މުޖްތަބާ ޚާމަނާއީއާ ބައްދަލުކުރައްވައި މުހިންމު މަޝްވަރާތަކެއް ކުރައްވާފައިވާ ކަމަށް ވިދާޅުވިއެވެ. އަދި އީރާނުގެ އެތެރޭގެ ހާލަތު ރަނގަޅުކޮށް ރައްޔިތުންގެ ކުރިއެރުމަށް އިންވެސްޓް ކުރައްވާނެ ކަމަށްވެސް އެމަނިކުފާނު ހާމަކުރެއްވިއެވެ.
މި ލިޔުން ކިޔާލުމުން
