ސަރުކާރުން ރައްޔިތުން އެދޭ ފަދަ ހެޔޮ ބަދަލުތަކެއް ގެނެސްދީ، ބޮޑެތި މައްސަލަތަކަށް ހައްލު ހޯދައިދެވޭނެ ކަމަށް ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.
"އަހާ ފޯރަމް" ގައި ވާހަކަދައްކަވަމުން ވަޒީރު ވިދާޅުވީ، ވޭތުވެދިޔަ މުއްދަތުގައި ވުޒާރާއިން ކުރި މަސައްކަތްތަކާމެދު ހިތްހަމަޖެހިވަޑައިގަންނަވާ ކަމަށާއި، ނަމަވެސް އިތުރަށް ރަނގަޅުކޮށް ހައްލުކުރަންޖެހޭ ގިނަ ކަންތައްތަކެއް އަދިވެސް ހުރިކަން ގަބޫލުކުރައްވާ ކަމަށެވެ. އަދި ސަރުކާރުގެ ބާކީ އޮތް ދެ އަހަރުގެ ތެރޭގައި އެދެވޭ ނަތީޖާއެއް ނެރުމަށް މަސައްކަތް ކުރައްވާނެ ކަމަށް ވިދާޅުވިއެވެ.
މަސްތުވާތަކެތި އެތެރެކުރުން ހުއްޓުވުމާ ގުޅޭގޮތުން އާންމުންގެ ސުވާލަކަށް ޖަވާބުދެއްވަމުން އިޙްސާން ފާހަގަކުރެއްވީ، ވެލާނާ އިންޓަނޭޝަނަލް އެއާޕޯޓާއި އައްޑޫ އެއާޕޯޓުގައި ބޮޑީ ސްކޭނަރު ބަހައްޓައިގެން ފާސްކުރަން ފަށާފައިވާ ކަމަށެވެ. އެގޮތުން ހަށިގަނޑު ތެރޭގައި ފޮރުވައިގެން ޑްރަގްސް އެތެރެކުރަން އުޅުނު ނޭޕާލްގެ ދެ މީހަކުވެސް އިއްޔެ ހައްޔަރުކޮށްފައިވާކަން ފާހަގަކުރެއްވިއެވެ.
ވަޒީރު އިތުރަށް ވިދާޅުވީ، ބޯޑަރުގެ ސެކިއުރިޓީ ވަރުގަދަކޮށް އިންޓެލިޖެންސް އުސޫލުން ކުރެވޭ މަސައްކަތްތަކާއެކު މަސްތުވާތަކެތި އެތެރެކުރުމުގެ މައްސަލައަށް ހައްލެއް ލިބޭނެ ކަމަށެވެ. އަދި ގާނޫނަށް ގެނެވުނު ބަދަލާއެކު، ވަކި ވަރަކަށްވުރެ ގިނައިން މަސްތުވާތަކެތި އެތެރެކުރާ މީހުންނަށް މަރުގެ ހުކުމް އިއްވޭނެ ކަމަށާއި، އެ ހުކުމް ތަންފީޒުކުރުމަކީ މި ސަރުކާރުގެ ވައުދެއް ކަމަށްވެސް ވަޒީރު އިޙްސާން ވިދާޅުވިއެވެ.
މި ލިޔުން ކިޔާލުމުން
