އަންނަ އަހަރުގެ މެއި މަހާ ހަމައަށްދާއިރު ރާއްޖޭގައި ބިދޭސީންގެ މައްސަލަ %100 ހައްލުކުރެވޭނެ ކަމުގެ ޔަގީންކަން ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާ ބެހޭ ވަޒީރު ޢަލީ އިޙްސާން ދެއްވައިފިއެވެ.
"އަހާ ފޯރަމް" ގައި ވާހަކަދައްކަވަމުން ވަޒީރު ވިދާޅުވީ، ކުރީގެ ސަރުކާރުން 295،000 ބިދޭސީންގެ ރެކޯޑު ދޫކޮށްލާފައިވާއިރު، އޭގެ ތެރެއިން އައިޑެންޓިފައި ކުރެވިފައިވަނީ އެންމެ 22،000 މީހުން ކަމަށެވެ. ނަމަވެސް، މި ސަރުކާރުން ފެށި "ކުރަނގި" އޮޕަރޭޝަންގެ ދަށުން މިހާތަނަށް 263،000 ބިދޭސީންގެ މައުލޫމާތު ޔަގީންކުރެވި، ރާއްޖޭގައި ތިބި ބިދޭސީންގެ %95 މީހުންގެ ބަޔޯމެޓްރިކްސް ނެގިފައިވާ ކަމަށް އިޙްސާން ފާހަގަކުރެއްވިއެވެ.
އިމިގްރޭޝަނާއި، ފޮރިން ލޭބާ ޑިޕާޓްމެންޓް އަދި ކައުންސިލްތައް ގުޅިގެން ހިންގި މި އޮޕަރޭޝަންގެ ދެވަނަ ފިޔަވަހި މިހާރު ފަށާފައިވާއިރު، މިއީ ގަވާއިދާ ހިލާފަށް އުޅޭ ބިދޭސީންނާއި، ވިސާ ފީ ނުދައްކާ ނުވަތަ އައި ހުއްދައިގެ ބޭރުން މަސައްކަތްކުރާ ބިދޭސީން ހޯދައި ހައްޔަރުކޮށް ރާއްޖެއިން ފޮނުވާލުމުގެ ފިޔަވަހީގެ މަސައްކަތެވެ.
ވަޒީރު އިތުރަށް ވިދާޅުވީ، ބިދޭސީންގެ އާބާދީ ބޮޑެތި ސަރަހައްދުތަކުގައި ޚާއްޞަ އޮޕަރޭޝަންތައް ހިންގައި، އަންނަ އަހަރުގެ މެއި މަހާ ހަމައަށް ދާއިރު ބިދޭސީންގެ މައްސަލައަށް %100 ހައްލެއް ހޯދުމަކީ ސަރުކާރުގެ އަމާޒު ކަމަށެވެ.
މި ލިޔުން ކިޔާލުމުން
