ކުޑަކުދިންނަށް ކުރާ އަނިޔާތައް ހުއްޓުވައި، އެކުދިންގެ ޙައްޤުތައް ރައްކާތެރިކުރުމުގެ ނިޒާމު ބައިނަލްއަޤްވާމީ އަދި ޤައުމީ ފެންވަރުގައި ހަރުދަނާކުރުމަށް އެކުލަވާލާފައިވާ "ބޮގޯޓާ ކޯލް ޓު އެކްޝަން" ގަރާރުގައި ދިވެހިރާއްޖެއިން މިއަދު ސޮއިކޮށްފިއެވެ.
މި ގަރާރުގައި ރާއްޖޭގެ ފަރާތުން ސޮއިކުރެއްވީ މިނިސްޓަރ އޮފް ހެލްތު، ފެމިލީ އެންޑް ވެލްފެއަރ ޤީލާ އަލީއެވެ. "ބޮގޮޓާ ކޯލް ޓު އެކްޝަން" އަކީ 2024 ވަނަ އަހަރުގެ ނޮވެމްބަރު މަހު ކޮލަމްބިއާގެ ބޮގޮޓާގައި ބޭއްވި، ކުޑަކުދިންނަށް ކުރާ އަނިޔާ ހުއްޓުވުމާ ބެހޭ ފުރަތަމަ ބައިނަލްއަގްވާމީ މަހާސިންތާގައި ބައިވެރިވި ޤައުމުތަކުން އިސްނަގައިގެން އިފުތިތާހުކުރި ގަރާރެކެވެ.
މި ގަރާރުގެ މައިގަނޑު އަސާސްތަކުގެ ތެރޭގައި ހެކީގެ މައްޗަށް ބިނާކޮށް ރައްކާތެރިކަމުގެ ފިޔަވަޅުތައް އެޅުމާއި، ގާނޫނީ އަދި ސިޔާސަތުތަކުގެ އޮނިގަނޑުތައް ވަރުގަދަކުރުމުގެ އިތުރުން ޑިޖިޓަލް މާހައުލުގައި ކުދިންނަށް ރައްކާތެރިކަން ކަށަވަރުކޮށްދިނުން ހިމެނެއެވެ. އަދި ކުޑަކުދިންގެ ރައްކާތެރިކަމާ ގުޅޭ ނިންމުންތަކުގައި އެކުދިންގެ ބައިވެރިވުން މާނަހުރި ގޮތެއްގައި ހިމެނުމަށްވެސް ބާރުއަޅާފައިވެއެވެ.
މި ގަރާރުގައި ހިމެނޭ ކަންކަމަކީ، ކުޑަކުދިންނަށް ކުރާ އަނިޔާ ހުއްޓުވުމަށް ދިވެހިރާއްޖެއިން 2024 ގައި އެކުލަވާލި 'ނޭޝަނަލް އެކްޝަން ޕްލޭން އޮން ޕްރިވެންޝަން އެންޑް ރެސްޕޯންޑިންގ ޓު ވަޔަލެންސް އަގެއިންސްޓް ޗިލްޑްރަން' އާ ސީދާ ގުޅިލާމެހޭ ކަންކަމެވެ. އެގޮތުން ގޭތެރެއާއި، ތައުލީމީ މަރުކަޒުތަކާއި، މުޖުތަމައުގެ އިތުރުން އިންޓަނެޓްގެ މާހައުލުގައިވެސް ކުޑަކުދިންނަށް އަމާންކަން ކަށަވަރުކޮށްދިނުމާއި، ނުރައްކަލަށް ހުށަހެޅޭ ކުދިން ދުރާލާ ދެނެގަނެ އެހީތެރިކަން ފޯރުކޮށްދިނުމަށް ރާއްޖޭގެ އެކްޝަން ޕްލޭންގައި އިސްކަންދީފައިވެއެވެ.
މި ގަރާރުގައި ރާއްޖެއިން ބައިވެރިވުމާއެކު، ކުޑަކުދިން ރައްކާތެރިކުރުމަށް ޤައުމީ ފެންވަރުގައި ކުރެވޭ މަސައްކަތްތައް އިތުރަށް ހަލުއިވެ، ބައިނަލްއަގްވާމީ މައިދާނުގައި ރާއްޖޭގެ ދައުރު ފުޅާވެގެންދާނެއެވެ.
މި ލިޔުން ކިޔާލުމުން
