އެޑްވެންޗާ އަޕުން އިންތިޒާމުކޮށްގެން ކުރިއަށް ގެންދާ "އައިލެންޑް ކާނިވާލް" އާއެކު ކުޅުދުއްފުށި ސިޓީއަށް މުނިފޫހިފިލުވުމާއި ވިޔަފާރީގެ ބޮޑު އީދެއް އަންނަނީ ކަމަށް އެ ސިޓީގެ މޭޔަރު މުހައްމަދު އާތިފް މިއަދު ވިދާޅުވެއްޖެއެވެ.
ބޮޑުތިލަދުންމަތީގެ ބޮޑު ބާޒާރާއެކު މާދަމާ ފަށާ މި ކާނިވާލް އަންނަ އާދިއްތަ ދުވަހުގެ ނިޔަލަށް ކުރިއަށްދާނެއެވެ. މި ހަރަކާތާ ގުޅޭގޮތުން މޭޔަރު އާތިފް ވިދާޅުވީ، މި ބާޒާރަކީ ބޮޑުތިލަދުންމަތީގެ އިގުތިޞާދީ ހަރަކާތްތައް އިތުރުކޮށް، ކުޅުދުއްފުށީގެ އިގުތިޞާދު ފުޅާކުރުމަށް ކުރިއަށް ގެންދާ މުހިންމު ހަރަކާތެއް ކަމަށެވެ. އެގޮތުން އާ ވިޔަފާރިވެރިން އުފައްދައި، އިތުރު ފުރުސަތުތައް ފަހިކޮށްދިނުމުގެ އިތުރުން ސަރަހައްދުގެ ރައްޔިތުންނަށް ހެޔޮ އަގުގައި އާންމު މުދާ ފޯރުކޮށްދިނުމަކީ ކައުންސިލުގެ ބޮޑު އަމާޒެއް ކަމަށް އޭނާ ފާހަގަކުރެއްވިއެވެ.
މީގެ އިތުރުން، އަތޮޅުތެރޭގެ ރަށްތަކުގެ ރައްޔިތުންނަށް އާންމުކޮށް ތަޖުރިބާ ނުކުރެވޭ ފަދަ ތަފާތު މުނިފޫހިފިލުވުމުގެ ހަރަކާތްތައް މި ކާނިވަލުގައި ހިމެނޭނެއެވެ. އޭގެ ތެރޭގައި ލޭޒާ ޓެކާއި، ބުލް ބޭޝްގެ އިތުރުން ރާއްޖެއިން ބޭރުން ތައްޔާރުކޮށްގެން ގެނެސްފައިވާ ބިރުވެރި ހޮހަޅައެއްވެސް ހިމެނެއެވެ.
މި ހަރަކާތް އިންތިޒާމުކުރާ އެޑްވެންޗާ އަޕުން މައުލޫމާތު ދޭ ގޮތުގައި، މިއީ ވިޔަފާރިތަކުގެ އުފެއްދުންތައް މާކެޓުކޮށް އިޝްތިހާރުކުރުމަށް ލިބޭނެ ރަނގަޅު ފުރުސަތެކެވެ. މި ފަހަރުގެ އައިލެންޑް ކާނިވާލްގެ މީޑިއާ ޕާޓްނަރަކީ އެސްއެސް މީޑިއާއެވެ.
މި ލިޔުން ކިޔާލުމުން
