އިމާރާތްތަކުގައި ހަކަތަ ސަމަކާރަކުރުމާ ގުޅޭ ދިވެހިރާއްޖޭގެ މިންގަނޑުތަކަށް އަހުލުވެރިކުރުވުމަށްޓަކައި 3 ދުވަހުގެ ތަމްރީނު ވޯކްޝޮޕެއް މިއަދު ފަށައިފިއެވެ.
މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވުޒާރާއާއި، ކްލައިމެޓް އެންޑް ކްލީން އެއާ ކޯލިޝަން (ސީސީއޭސީ) ގުޅިގެން ކުރިއަށްގެންދާ މި ވޯކްޝޮޕް އޮންނާނީ ސެޕްޓެންބަރު 29 އިން އޮކްޓޫބަރު 1 ގެ ނިޔަލަށް މީރުމާ ހޯލުގައެވެ. މި ތަމްރީނުތައް ފޯރުކޮށްދެނީ ޑިލޮއިޓް މޯލްޑިވްސްގެ ފަންނީ މާހިރުންގެ ޓީމަކުންނެވެ.
މި ވޯކްޝޮޕް ރަސްމީކޮށް އިފުތިތާހުކޮށްދެއްވީ މިނިސްޓަރ އޮފް ސްޓޭޓް ޑރ. މުޢާވިޔަތު މުޙައްމަދެވެ. އެމަނިކުފާނުގެ ވާހަކަފުޅުގައި، އިމާރާތެއް ފަރުމާކުރުމާއި ބިނާކުރުމުގެ އެންމެ ކުރީ މަރުޙަލާއިން ފެށިގެން ހަކަތައިގެ އިސްރާފު ކުޑަކުރުމުގެ ވިސްނުން ގެންގުޅުމަކީ މުޅި ޤައުމުގެ ހަކަތަ ބޭނުންކުރާ މިންވަރަށް ދާއިމީ ހެޔޮ އަސަރުތަކެއް ކުރާނެ ކަމެއްކަން ފާހަގަކުރެއްވިއެވެ. އަދި "މޯލްޑިވްސް އެނާޖީ އެފިޝަންސީ ގައިޑްލައިން ފޯ ބިލްޑިންގްސް" ގެ ފުރިހަމަ ނަތީޖާ ފެންނާނީ ދާއިރާގެ ފަންނީ ބޭފުޅުން މި އުސޫލުތައް ރަނގަޅަށް އޮޅުންފިލުވައި އަމަލީ މަސައްކަތުގައި ތަންފީޒުކޮށްގެން ކަމަށްވެސް ވިދާޅުވިއެވެ.
އިންޖިނިއަރިންގ، އާކިޓެކްޗަރ އަދި އިމާރާތްކުރުމުގެ ދާއިރާ ތަމްސީލުކުރާ ސަރުކާރުގެ މުއައްސަސާތަކާއި، އަމިއްލަ ކުންފުނިތަކުގެ އިތުރުން އަމިއްލަ ގޮތުން މަސައްކަތްކުރާ ފަންނީ ބޭފުޅުން ހިމެނޭހެން ޖުމުލަ 40 ބައިވެރިން މި ވޯކްޝޮޕްގައި ބައިވެރިވެއެވެ.
މި ވޯކްޝޮޕްގައި އަލިއަޅުވާލެވޭ މައިގަނޑު ދާއިރާތަކުގެ ތެރޭގައި:
- އިމާރާތުގެ ބޭރުގެ ފަރުމާ (ބިލްޑިންގ އެންވެލޮޕް) އަދި އެތެރޭގެ ފިނިހޫނުމިން ހިފެހެއްޓުން
- އަލިކުރުމާއި، ފެނާއި ނަރުދަމާގެ ނިޒާމުތައް
- އިއާދަކުރަނިވި ހަކަތައިގެ ނިޒާމުތަކާއި އިމާރާތް ބެލެހެއްޓުން
- "އީ ކުއެސްޓް" ސޮފްޓްވެއަރ ބޭނުންކޮށްގެން ރާއްޖޭގެ މޫސުމަށް ރިއާޔަތްކޮށް ހަކަތަ މޮޑެލްކުރުމާއި، ހަކަތަ ސަލާމަތްކުރެވޭނެ ގޮތްތައް ދެނެގަތުމުގެ އަމަލީ ތަމްރީނު
މި މަސައްކަތުގެ ނަތީޖާއެއްގެ ގޮތުން އިމާރާތްތަކުގައި ހަކަތަ ބޭނުންކުރާ މިންވަރު މަދުވެ، ކަރަންޓު ބިލުތަކަށް ކުރާ ހޭދަ ކުޑަވުމުގެ އިތުރުން، ތިމާވެށްޓާއި ދެމެހެއްޓެނިވި ތަރައްގީއަށް ރާއްޖެއިން ކަނޑައަޅާފައިވާ ލަނޑުދަނޑިތައް ހާސިލުކުރުމަށް ބޮޑު އެހީތެރިކަމެއް ލިބިގެންދާނެއެވެ.
މި ލިޔުން ކިޔާލުމުން
