ޤައުމީ އެއާލައިން، މޯލްޑިވިއަންގެ ސީޕްލޭން ޓާމިނަލް ބޮޑެތި ބަދަލުތަކަކާއެކު ޒަމާނީ ފެންވަރަށް ތަރައްގީކޮށް މިއަދު ރަސްމީކޮށް ހުޅުވައިފިއެވެ.
ރާއްޖެއަށް ޒިޔާރަތްކުރާ ފަތުރުވެރިންނަށް ޕްރިމިއަމް ހިދުމަތްތަކެއް ދެވޭގޮތަށް ފަރުމާކޮށްފައިވާ މި ޓާމިނަލުން ރާއްޖޭގެ ގުދުރަތީ ރީތިކަމާއި ސަގާފަތް ދައްކުވައިދެއެވެ. މި ބަދަލާއެކު ޓާމިނަލްގެ ޖާގަ ދެގުނައަށް ބޮޑުކުރެވި، އެތެރޭގައި އެއްފަހަރާ 90 މީހުންނަށް އަދި ބޭރުގައި 40 މީހުންނަށް ހިދުމަތް ދެވޭނެ އިންތިޒާމު ވަނީ ހަމަޖައްސާފައެވެ. މީގެ އިތުރުން ކިޑްސް ޕްލޭ އޭރިއާއަކާއި، ސުވެނިއާ އަދި ލުއިކާނާ ލިބޭނެ ކިއޮސްކަކާއި، ބޯޓިން ގޭޓުތަކުގެ އިތުރުން މުވައްޒަފުންގެ ކެންޓީނެއްވެސް ވަނީ ގާއިމުކޮށްފައެވެ.
ޓާމިނަލް ހުޅުވުމުގެ ރަސްމިއްޔާތުގައި އައިލެންޑް އޭވިއޭޝިއަންގެ މެނޭޖިން ޑިރެކްޓަރު އިބްރާހިމް އިޔާސް ވިދާޅުވީ، މިދިޔަ އަހަރު ފެށި މި މަޝްރޫއުގެ ދަށުން ތަނުގެ އިންޓީރިއާ އަދި އެކްސްޓީރިއާއަށް ބޮޑެތި ބަދަލުތަކެއް ގެނެސްފައިވާ ކަމަށެވެ. އަދި ހިދުމަތް ފުޅާކުރުމުގެ ގޮތުން އެންމެ ފަހުގެ ދެ ޓުވިން އޮޓާ ކްލެސިކް މަތިންދާބޯޓަށް އޯޑަރު ދީފައިވާ ކަމަށާއި، އަންނަ އަހަރު އެ ބޯޓުތައް ގެނެސް ހިދުމަތަށް ނެރެވޭނެ ކަމަށް އޭނާ ވިދާޅުވިއެވެ.
މި ރަސްމިއްޔާތުގައި ޓޫރިޒަމް މިނިސްޓަރު މުހައްމަދު އަމީން ވަނީ މޯލްޑިވިއަންގެ މާލީ ހާލަތު ރަނގަޅުވަމުން އަންނަކަން ފާހަގަކުރައްވައި، ކުންފުނީގެ އެސެޓުތަކާއި އިންފްރާސްޓްރަކްޗާ ތަރައްގީކުރުމުގެ މުހިންމު މަސައްކަތްތަކެއް ކުރެވެމުންދާ ކަމަށް ވިދާޅުވެފައެވެ.
2014 ވަނަ އަހަރު ސީޕްލޭން ހިދުމަތް ފެށި މޯލްޑިވިއަންގެ ސީޕްލޭން ފްލީޓުގައި މިހާރު 11 ޓުވިން އޮޓާ މަތިންދާބޯޓު އޮވެއެވެ.
މި ލިޔުން ކިޔާލުމުން
