ރާއްޖޭގައި މިހާތަނަށް އެޗްއައިވީ ޖެހިފައިވާ 76 މީހުން ރިޕޯޓުކޮށްފައިވާ ކަމަށާއި، ނަމަވެސް އެ ކޭސްތައް މެނޭޖްކުރެވިފައިވަނީ އެހެން ޤައުމުތަކާ އަޅައިބަލާއިރު ވަރަށް ކުޑަ މިންވަރެއްގައި ކަމަށް ހެލްތު މިނިސްޓަރ ގީލާ އަލީ ވިދާޅުވެއްޖެއެވެ.
ދިވެހިރާއްޖޭގެ އަޑުގެ "އަހަށޭ ބުނާށޭ" ޕްރޮގްރާމްގައި ވާހަކަދައްކަވަމުން މިނިސްޓަރ ވިދާޅުވީ، ރާއްޖެއިން އެންމެ ފުރަތަމަ އެޗްއައިވީ ވޭދަނައެއް ފެނިފައިވަނީ 1991 ވަނަ އަހަރު ކަމަށެވެ. އަދި މިހާތަނަށް ރިޕޯޓުކުރެވުނު 76 މީހުންގެ ތެރެއިން މިވަގުތު ދުނިޔޭގައި ތިބީ 52 މީހުން ކަމަށް އެ ކަމަނާ ވިދާޅުވިއެވެ.
ފިޖީ ފަދަ ޤައުމުތަކުގައި ބަލި ކުއްލިއަކަށް ފެތުރި ކުއްލި ނުރައްކަލުގެ ހާލަތު އިއުލާނުކޮށްފައިވާތީ ރާއްޖޭގެ ހާލަތާ ގުޅޭގޮތުން ސުވާލުކުރުމުން މިނިސްޓަރ ވިދާޅުވީ، އެހެން ޤައުމުތަކާ ޚިލާފަށް ރާއްޖޭގައި ބަލި ފެތުރޭ މިންވަރު ކޮންޓްރޯލް ކުރެވިފައިވާ ކަމަށެވެ. އަދި ބަލިޖެހުނު ކޮންމެ މީހަކަށްވެސް ބަލި ޖެހެން މެދުވެރިވި ސަބަބުތައް ސާފުކޮށް އެނގޭ ކަމަށާއި، މިހާރު ސަރުކާރުން ބައްޔަށް ހޭލުންތެރިކުރުމާއި ފަރުވާ ދިނުމުގެ ވަސީލަތްތައް ފުރިހަމައަށް ގާއިމުކޮށްފައިވާނެ ކަމަށް އެ ކަމަނާ ފާހަގަކުރެއްވިއެވެ.
މި ލިޔުން ކިޔާލުމުން
