ޕީޕަލްސް ރިޕަބްލިކް އޮފް ޗައިނާގެ 77 ވަނަ ޤައުމީ ދުވަހުގެ މުނާސަބަތުގައި، އެ ޤައުމުގެ ރައީސް ޝީ ޖިންޕިންގ އާއި ސްޓޭޓް ކައުންސިލްގެ ޕްރީމިއަރ ލީ ޗިއާންގ އަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ތަހުނިޔާ އާއި ހެޔޮއެދުންތައް ފޮނުއްވައިފިއެވެ.
އެ މަނިކުފާނު އެ ލީޑަރުންނަށް ވަކިވަކިން ފޮނުއްވި ޚާއްޞަ ސިޓީފުޅުތަކުގައި، ދިވެހި ސަރުކާރާއި ރައްޔިތުންގެ ނަމުގައި ޗައިނާ ސަރުކާރަށާއި ރައްޔިތުންނަށް އިޚްލާޞްތެރިކަމާއެކު ތަހުނިޔާ އަރިސްކުރެއްވިއެވެ. މިއަދަކީ ޤައުމުގެ ހަމަޖެހުން ދަމަހައްޓައި، ރައްޔިތުންގެ ކުރިއެރުމާއި ލާބައަށް މަސައްކަތްކުރުމުގެ އިތުރުން، އެ ޤައުމުގެ ރައްޔިތުންގެ މެދުގައި އެކުވެރިކަމާއި އެއްބައިވަންތަކަން އިތުރަށް ހަރުދަނާކުރުމަށް ލިބޭ ރަނުގެ ފުރުޞަތެއްކަން އެ މަނިކުފާނު ފާހަގަކުރެއްވިއެވެ.
ރައީސުލްޖުމްހޫރިއްޔާގެ ސިޓީފުޅުގައި، ދިވެހިރާއްޖެއާއި ޗައިނާއާ ދެމެދު އޮތް ބަދަހި ގުޅުމަކީ ޒަމާންވީ އެކުވެރިކަމާއި، ގާތް ގުޅުމުގެ މައްޗަށާއި، އަދި ޚާއްޞަކޮށް 'ވަން ޗައިނާ ޕްރިންސިޕަލް' އަށް ދިވެހިރާއްޖެއިން ދޭ ސާބިތު އެއްބާރުލުމުގެ މައްޗަށް ބިނާވެފައިވާ ވަރުގަދަ ގުޅުމެއްކަމަށް ބަޔާންކުރައްވާފައިވެއެވެ. އަދި ޗައިނާގެ ފަރާތުން މެދުކެނޑުމެއްނެތި ލިބެމުންދާ އެހީތެރިކަމާއި، ދެ ޤައުމުގެ ގުޅުމުގެ ތެރެއިން ވޭތުވެދިޔަ އަހަރުތަކުގައި ރާއްޖެއަށް އިޖުތިމާޢީ އަދި އިޤްތިޞާދީ ދާއިރާއިން ފާހަގަކޮށްލެވޭ ބޮޑެތި ކުރިއެރުމާއި ކާމިޔާބީތައް ޙާޞިލުކުރެވިފައިވާކަން އެ މަނިކުފާނު އުފަލާއެކު ފާހަގަކުރެއްވިއެވެ.
މީގެ އިތުރުން، ކުރިއަށް އޮތް ތަނުގައިވެސް ދެ ޤައުމުގެ ގުޅުން އިތުރަށް ބަދަހިކޮށް، ދެ ޤައުމުގެ ރައްޔިތުންނަށް ފައިދާއާއި މަންފާ ލިބޭނެ ދާއިރާތަކުން ފުޅާ ދާއިރާއެއްގައި އެއްބާރުލުން ދެއްވާނެ ކަމުގެ ފުރިހަމަ ޔަޤީންކަން ރައީސުލްޖުމްހޫރިއްޔާ ދެއްވާފައިވެއެވެ. ސިޓީފުޅު ނިންމަވާލައްވަމުން، ޗައިނާގެ ދެ ލީޑަރުންނަށް ދުޅަހެޔޮ ޞިއްޙަތާއި ފާގަތި ކަމަށް އެދިވަޑައިގަންނަވަމުން، ޗައިނާއަށް ދާއިމީ ޞުލްޙަމަސަލަސްކަމާއި އެއްބައިވަންތަކަމަށް އެދިވަޑައިގެން ދުޢާކުރައްވާފައިވެއެވެ. މި މުނާސަބަތުގެ ތަހުނިޔާ ރައީސުލްޖުމްހޫރިއްޔާ ވަނީ އެ މަނިކުފާނުގެ ރަސްމީ އެކްސް އެކައުންޓު މެދުވެރިކޮށްވެސް ޙިއްސާކުރައްވާފައެވެ.
މި ލިޔުން ކިޔާލުމުން
