ނިވާކަން ކުޑަކޮށް ހެދުން އަޅައިގެން އާންމު ތަންތަނުގައި އުޅޭ ބިދޭސީންނާއި ފަތުރުވެރިންނަށް ޤާނޫނީ ފިޔަވަޅު އަޅާނެ ކަމުގެ އިންޒާރު މޯލްޑިވްސް ޕޮލިސް ސާވީސްއިން ދީފިއެވެ.
ފުލުހުން މިއަދު ނެރުނު ބަޔާނެއްގައި ބުނީ، ދިވެހި މުޖުތަމަޢުގެ އަޚްލާޤީ އަދި އިޖުތިމާޢީ މިންގަނޑުތައް ހިފެހެއްޓުމަކީ ރާއްޖޭގައި ދިރިއުޅޭ އެންމެހައި ފަރާތްތަކުގެ މަސްއޫލިއްޔަތެއް ކަމަށެވެ. އަދި ބައެއް ބިދޭސީން އާންމު އިޖުތިމާއީ މިންގަނޑާ ހިލާފަށް ނިވާކަން ކުޑަކޮށް ހެދުން އަޅައިގެން މަގުމަތީގައާއި އާންމު ތަންތަނުގައި އުޅޭކަން ފާހަގަކުރެވިފައިވާ ކަމަށާއި، މިއީ މުޖުތަމަޢުގެ ސުލްހަމަސަލަސްކަމަށް އަސަރުކޮށްފާނެ ކަމެއް ކަމަށް ފުލުހުން ފާހަގަކުރިއެވެ.
އެހެންކަމުން، މިފަދަ ކަންކަން ހުއްޓުވުމަށްޓަކައި ޤާނޫނު ނަންބަރު 2010/11 (އާންމު އިޖްތިމާއީ މިންގަނޑުތަކާ ހިލާފު އަމަލުތައް ހުއްޓުވުމުގެ ގާނޫނު) ގެ ދަށުން އަޅަންޖެހޭ ފިޔަވަޅުތައް އަޅަމުންދާނެ ކަމަށް ފުލުހުން ބުންޏެވެ. އަދި ބިދޭސީންގެ އަމަލުތައް މިންގަނޑުތަކަށް ފައްތައި އަޚްލާޤީ ހަމަތައް ހިފެހެއްޓުމަށް ބިދޭސީންނާ ހަވާލުވެތިބި ފަރާތްތަކުން ޚާއްޞަ ސަމާލުކަމެއް ދިނުމަށް ފުލުހުން ވަނީ އިލްތިމާސްކޮށްފައެވެ.
މީގެއިތުރުން، ރާއްޖެއަށް ޒިޔާރަތްކުރާ ފަތުރުވެރިންނަށް ޚާއްޞަކުރެވިފައިވާ ސަރަޙައްދުތައް ފިޔަވައި، މީހުން ދިރިއުޅޭ ރަށްރަށުގެ އާންމު ތަންތަނާއި މަގުމަތީގައި އުޅޭއިރު ދިވެހިންގެ ސަގާފަތާއި އާދަކާދައަށް އިޙްތިރާމްކޮށް، އެކަށީގެންވާ ގޮތުގައި ހެދުން އަޅައިގެން އުޅުމަށް ފުލުހުން ވަނީ އިލްތިމާސްކޮށްފައެވެ. އަދި މިއާ ހިލާފުވާ ފަރާތްތަކާމެދުވެސް ގާނޫނީ ފިޔަވަޅު އަޅާނެކަމަށް ފުލުހުންގެ ބަޔާނުގައި ބުނެފައިވެއެވެ.
މި ލިޔުން ކިޔާލުމުން
