އެމެރިކާ އަދި އިސްރާއީލުން އީރާނާ ދެކޮޅަށް ކުރަމުންދާ ހަނގުރާމައިގެ ސަބަބުން އުފެދިފައިވާ "ބިންހެލުމަށް" ފަހު، މައްސަލަ އިތުރަށް ގޯސްވަމުންދާ ދައުރުތަކަކާ މެދު އިންޒާރު ދެއްވަމުން، މެދުއިރުމަތީގެ ސަލާމަތާއި ރައްކާތެރިކަމުގެ ޝަރުޠެއްގެ ގޮތުން ޤައުމުތަކުގެ ސިޔާދަތަށް އިޙްތިރާމްކުރުމަށް ޤަޠަރުގެ ބޮޑުވަޒީރު އަދި ޚާރިޖީ ވަޒީރު ޝައިޚް މުޙައްމަދު ބިން ޢަބްދުއްރަޙްމާން ބިން ޖާސިމް އަލްޘާނީ ގޮވާލައްވައިފިއެވެ.
ނިއުޔޯކް ސިޓީގައި ބޭއްވުނު އދ. ގެ ޢާންމު މަޖިލީހާ ގުޅުވައިގެން ކުރިއަށްދިޔަ ޤަޠަރު އިކޮނޮމިކް ފޯރަމްގެ އިވެންޓް ހުޅުވުމުގެ ރަސްމިއްޔާތުގައި އާދީއްތަ ދުވަހު ވާހަކަދައްކަވަމުން ޝައިޚް މުޙައްމަދު ވިދާޅުވީ، މި ސަރަޙައްދަށް ބޭނުންވަނީ ސިޔާދަތަށް އިޙްތިރާމްކުރެވޭ އަދި އެއްވެސް ޤައުމަކުން އަނެއް ޤައުމަކަށް ނުރައްކަލެއް ކުރިމަތިނުކުރެވޭނެ ފަދަ އޮނިގަނޑެއް ކަމަށެވެ. އަދި ހަނގުރާމައިގެ ސަބަބުން ކުރިމަތިވާ އިޤްތިޞާދީ ލޮޅުންތަކުގެ ރާޅުތައް ސަރަޙައްދީ ރޮނގުތަކުން ބޭރަށް ފޯރައި، ސަލާމަތާއި ހަމަޖެހުމާ މެދު ކުރެވިފައިވާ އުންމީދުތަކަށް ގޮންޖަހަމުންދާ ކަމަށް އެމަނިކުފާނު ފާހަގަކުރެއްވިއެވެ.
"މި ކާރިސާގެ ތެރޭގައި، ގާތްގަނޑަކަށް ކޮންމެ މަޝްވަރާއެއް ފެށިގެން ދިޔައީ ސަލާމަތީ ކަންކަމާއި މައްސަލަ ފިނިކުރުމާ ބެހޭގޮތުން. ދެން އެއަށްފަހު ހަކަތަ ފޯރުކޮށްދިނުމާއި، ކަނޑު ދަތުރުފަތުރުގެ މަގުތަކާ ގުޅޭގޮތުން، އަދި އަޅުގަނޑުމެންގެ އިންވެސްޓްމަންޓްތަކާއެކު، ޕްލޭންތައް ކުރިއަށްދާނެ. މި ހުރިހާ ވާހަކައަކީވެސް އެއް ސުވާލެއް ތަފާތު ގޮތްގޮތަށް ފާޅުކުރުން. މިހާ ގިނަ ކަންކަމަށް ބުރޫއަރަމުންދާއިރު، ދެން އިތުބާރު ކުރެވޭނީ ކޮން ކަމަކަށް ހެއްޔެވެ؟" ބޮޑުވަޒީރު ވިދާޅުވިއެވެ. މީގެއިތުރުން އެއްވެސް ޤައުމެއް ދާއިމީގޮތެއްގައި ނުރައްކަލަށް ހުށަހެޅިފައިވާ ފަދަ އިންތިޒާމުތަކެއްގެ ތެރެއިން ދާއިމީ ސަލާމަތެއް ބިނާއެއް ނުކުރެވޭނެ ކަމަށާއި، ޖެހޭނީ ނުތަނަވަސްކަން އުފެދޭ އަސްލު ސަބަބުތަކަށް ޙައްލު ހޯދަން ކަމަށްވެސް އެމަނިކުފާނު ވިދާޅުވިއެވެ.
މި ބައްދަލުވުމުގައި ބޮޑުވަޒީރު ވަނީ ކުރިއަށް އޮތް ފަސް އަހަރު ދުވަހުގެ ތެރޭގައި ޤަޠަރުގެ އުމްރާނީ ތަރައްޤީއަށް 38 ބިލިއަން ޑޮލަރަށް ވުރެ ގިނަ ފައިސާ ޚަރަދުކުރުމަށް ވަޢުދުވެވަޑައިގެންފައެވެ. މި އިންވެސްޓްމަންޓްތަކުގެ މައިގަނޑު ބޭނުމަކީ އަމިއްލަ އިންވެސްޓަރުން ޝައުޤުވެރިކުރުވުމާއި ޤަޠަރުގެ ސާބިތުކަމުގެ މެސެޖު ފޯރުކޮށްދިނުން ކަމަށް ރިޕޯޓްތައް ބުނެއެވެ.
އދ. ގެ ޢާންމު މަޖިލިސް ހޯމަ ދުވަހުން ފެށިގެން ހުކުރު ދުވަހުގެ ނިޔަލަށް ކުރިއަށްދާއިރު، ތަޤުރީރުތަކާއި ޑިޕްލޮމެޓިކް ބައްދަލުވުންތަކުގެ އެޖެންޑާގެ އެންމެ ކުރީގައި މެދުއިރުމަތީގެ ޙާލަތު އޮންނާނެ ކަމަށް ބެލެވެއެވެ. އަދި އާންމު މަޖިލީހުގެ ހަވާސާގައި އަންގާރަ ދުވަހު ޚަލީޖީ ލީޑަރުން އެމެރިކާގެ ރައީސް ޑޮނަލްޑް ޓްރަމްޕާ ބައްދަލުކުރައްވާއިރު މި މެސެޖު ތަކުރާރުކުރެވޭނެއެވެ.
މީގެއިތުރުން، އެމެރިކާ-އިސްރާއީލުން އީރާނާ ދެކޮޅަށް ކުރާ ހަނގުރާމަ ނިމުމަކަށް ގެނައުމަށްޓަކައި ތެހެރާނާއި ވޮޝިންޓަނާ ދެމެދު އަލުން މަޝްވަރާތައް ފެށުމަށް ޤަޠަރުން ކުރަމުންދާ މެދުވެރިއެއްގެ މަސައްކަތްތައް މެދުކެނޑުމެއްނެތި ކުރިއަށްދާ ކަމަށް އެ ޤައުމުގެ ޚާރިޖީ ވުޒާރާގެ ތަރުޖަމާނު މަޖިދް އަލް-އަންޞާރީ ވަނީ ހާމަކުރައްވާފައެވެ.
މި ލިޔުން ކިޔާލުމުން
