މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން މަސްވެރިންގެ އަތުން މަސް ގަންނަ އަގު މަތިކޮށް، މަސް ކިލޯއެއް 22 ރުފިޔާއަށް ގަންނަން ފަށައިފިއެވެ.
މިއީ މި ސަރުކާރު ވެރިކަމާ ހަވާލުވި ފަހުން މިފްކޯ އިން އެންމެ ބޮޑު އަގެއްގައި މަސް ގަންނަން ފެށި ފަހަރެވެ. އަދި މިއީ ވޭތުވެދިޔަ ތިން މަސްދުވަހުގެ ތެރޭގައި މަހުގެ އަގަށް މިފްކޯއިން ބަދަލު ގެނައި ހަތަރުވަނަ ފަހަރު ވެސް މެއެވެ.
މިފްކޯއިން މައުލޫމާތު ދޭ ގޮތުގައި، މަސް ގަންނަ އަގު ކަނޑައެޅުމުގައި ބަލަނީ ބައިނަލްއަޤްވާމީ ބާޒާރުގެ ޑިމާންޑާއި ސަޕްލައި އަށެވެ. މި ދުވަސްވަރަކީ ރާއްޖޭގައި މަސްވެރިކަން ދަށް ދުވަސްވަރެއް ނަމަވެސް، މަސްވެރިންނަށް ލިބޭ އާމްދަނީ އިތުރުކޮށްދިނުމަށް މިފްކޯއިން ކުރަމުންދާ މަސައްކަތުގެ ދަށުން އަގަށް މިވަނީ ހެޔޮ ބަދަލެއް ގެނެސްފައެވެ. އަދި ކުރިއަށް އޮތް ތަނުގައި ބާޒާރަށް އަންނަ ބަދަލުތަކާ އެކު މިހާރަށްވުރެ ވެސް އަގު ރަނގަޅުވުން އެކަށީގެންވާ ކަމަށާއި، މަސްވެރިންނަށް ފައިދާވާނެ ގޮތަށް އަގުތައް މުރާޖާ ކުރަމުން ގެންދާނެ ކަމަށް މިފްކޯ އިން ބުނެއެވެ.
މަސްވެރިންގެ ހައްޤުތައް ކަށަވަރުކުރުމުގެ ގޮތުން ސަރުކާރުން ވަނީ މަސް ކިލޯއެއްގެ އަގު 16 ރުފިޔާއަށް ވުރެ ދަށް ނުކުރުމަށް ވެސް ނިންމަވާފައެވެ.
މަސްވެރިންނަށް ލުއިފަސޭހަ ކޮށްދިނުމުގެ ގޮތުން އަގުހެޔޮކޮށް ތެލާއި، ފަސޭހައިން އައިސް ލިބޭނެ އިންތިޒާމުތައް މިހާރު ވަނީ ހަމަޖައްސައިދީފައެވެ. މީގެ އިތުރުން، ރާއްޖޭގައި ބާނާ މަސް ރާއްޖޭގައި އިތުރަށް ޕްރޮސެސްކޮށްގެން ބޭރުކުރުމުގެ ބޭނުމުގައި، ރާއްޖޭގެ ދެ ސަރަހައްދެއްގައި ދަޅުގައި މަސް ބަންދުކުރާ ކާރުޚާނާ އެޅުމަށް ބޭނުންވާ ބިމާއި ބަނދަރު ހެދުމުގެ އަމަލީ މަސައްކަތްތައް ވެސް ސަރުކާރުން މިހާރު ވަނީ ފަށާފައެވެ.
މި ލިޔުން ކިޔާލުމުން
