މިނިސްޓްރީ އޮފް އިންފްރާސްޓްރަކްޗަރ، ހައުސިންގ އެންޑް އަރބަން ޑިވެލޮޕްމަންޓްގެ އެދިލެއްވުމުގެ މަތިން، ހުޅުމާލޭގައި 50 އެނދުގެ ސައިކައިއެޓްރީ ހޮސްޕިޓަލެއް ޤާއިމުކުރުމުގެ މަސައްކަތް ކޮށްދޭނެ ފަރާތެއް ހޯދުމަށް މިނިސްޓްރީ އޮފް ފިނޭންސް އެންޑް ޕަބްލިކް އެންޓަރޕްރައިޒަސް އިން އިޢުލާނުކޮށް، ބީލަން ހުށަހެޅުމުގެ ފުރުޞަތު ހުޅުވާލައިފިއެވެ.
ފިނޭންސް މިނިސްޓްރީން ހާމަކުރި ގޮތުގައި މި މަސައްކަތަށް ޝަރުޠުހަމަވާ ފަރާތެއް ހޯދުމުގެ ކަންތައް ކުރިއަށްދާނީ އިންޓަނޭޝަނަލް ކޮމްޕެޓިޓިވް ބިޑިންގ (އައި.ސީ.ބީ) އުޞޫލުން، ދައުލަތުގެ މާލިއްޔަތުގެ ގަވާއިދާ އެއްގޮތްވާ ގޮތުގެ މަތިންނެވެ. މި ބީލަމުގައި ބައިވެރިވެވޭނީ އިންފްރާސްޓްރަކްޗަރ މިނިސްޓްރީގެ "ޢިމާރާތްކުރުމުގެ ޢަމަލީ މަސައްކަތްކުރާ ފަރާތްތަކުގެ ޤަވާޢިދު" ގެ ދަށުން ރަޖިސްޓަރީވެފައިވާ ފަރާތްތަކުގެ ތެރެއިން GC01 ގެ ގްރޭޑް 1، 2، 3، 4، 5، 6 ނުވަތަ 7 އަށް ޝަރުޠުހަމަވާ ކޮންޓްރެކްޓަރުންނަށެވެ. މީގެއިތުރުން، އިކޮނޮމިކް މިނިސްޓްރީގެ "ފޮރިން ޑައިރެކްޓް އިންވެސްޓްމަންޓް ޕޮލިސީ" އަށް ވެސް ރިޢާޔަތްކުރެވޭނެއެވެ.
މި ބީލަމުގައި ބައިވެރިވުމަށްޓަކައި -/1,500 (އެއްހާސް ފަސްސަތޭކަ) ރުފިޔާގެ ނޮން-ރިފަންޑަބަލް ރަޖިސްޓްރޭޝަން ފީއެއް ދައްކަންޖެހެއެވެ. ފީ ބަލައިގަތުމަށް ހަމަޖެހިފައިވަނީ 2026 ސެޕްޓެންބަރު 23 އިން އޮކްޓޫބަރު 20 ގެ ނިޔަލަށް، ސަރުކާރު ބަންދު ނޫން ކޮންމެ ދުވަހެއްގެ ހެނދުނު 8:00 އިން މެންދުރުފަހު 14:00 އަށް "ބަނޑޭރި ޕޭ" މެދުވެރިކޮށެވެ. ފައިސާ ދެއްކުމަށްފަހު، ކަމާބެހޭ މަޢުލޫމާތާއި ރަސީދު ފިނޭންސް މިނިސްޓްރީގެ އީމެއިލަށް ފޮނުވަންޖެހޭނެއެވެ.
މަސައްކަތާ ގުޅޭ ލިޔެކިޔުންތައް 2026 ސެޕްޓެންބަރު 24 އިން ފެށިގެން މިނިސްޓްރީގެ ވެބްސައިޓުން ޑައުންލޯޑް ކުރެވެން ހުންނާނެއެވެ. އަދި ބިޑް ސެކިޔުރިޓީގެ ގޮތުގައި 864,000.00 (އަށް ލައްކަ ފަސްދޮޅަސް ހަތަރު ހާސް) ރުފިޔާ ހުށަހަޅަންޖެހޭއިރު، އޭގެ މުއްދަތަކީ ބިޑު ހުޅުވާ ތާރީޚުން ފެށިގެން 148 ދުވަހެވެ.
މި ޕްރޮޖެކްޓުގެ ޕްރީބިޑް ބައްދަލުވުން 2026 އޮކްޓޫބަރު 7 ވާ ބުދަ ދުވަހުގެ ހެނދުނު 10:00 ގައި މައިކްރޮސޮފްޓް ޓީމްސް މެދުވެރިކޮށް ބޭއްވުމަށް ވަނީ ހަމަޖެހިފައެވެ. އަދި ޕްރޮޖެކްޓާ ގުޅޭގޮތުން ސުވާލެއްވާނަމަ، 2026 އޮކްޓޫބަރު 8 ވާ ބުރާސްފަތި ދުވަހުގެ މެންދުރު 13:00 ގެ ކުރިން އީމެއިލް ކުރަންޖެހެއެވެ.
ބީލަން ހުށަހެޅުން ކުރިއަށްދާނީ ބީލަން ޕޯޓަލް މެދުވެރިކޮށެވެ. ބިޑު ހުށަހެޅުމުގެ އެންމެ ފަހު ތާރީޚަކީ 2026 އޮކްޓޫބަރު 25 ވާ އާދީއްތަ ދުވަހުގެ މެންދުރު 13:00 އެވެ. އަދި ބިޑު ހުޅުވުން އޮންނާނީ 2026 އޮކްޓޫބަރު 26 ވާ ހޯމަ ދުވަހުގެ ހެނދުނު 11:00 ގައެވެ. މި މަސައްކަތަށް ބިޑު ހުށަހެޅުމަށް ހަމަޖެހިފައިވާ ތާރީޚުގެ މަދުވެގެން 3 ދުވަސް ކުރިން ޕޯޓަލްގައި ރަޖިސްޓަރީވާންޖެހޭނެއެވެ.
މި ލިޔުން ކިޔާލުމުން
