އީރާނާ ދެކޮޅަށް އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން ގެންގުޅޭ ސްޓްރެޓެޖީ އަދި ޕްރެޝަރުގެ މައިގަނޑު ތިން ލަނޑުދަނޑިއެއް، އެމެރިކާގެ ޓްރެޜަރީ ސެކްރެޓަރީ ސްކޮޓް ބެސެންޓް ވަނީ މީޑިއާއަށް ތަފްޞީލުކޮށްދެއްވާފައެވެ.
އެމެރިކާގެ ސިޔާސަތުތަކުގެ ފުޅާ ދާއިރާއެއްގެ މަޤްޞަދުތަކަށް އަލިއަޅުއްވާލައްވަމުން ބެސެންޓް ވިދާޅުވީ، މި ޕްރެޝަރުގެ ލަނޑުދަނޑިއަކީ ދުނިޔޭގެ ތިން ޙާލަތުގެ ތެރެއިން އެއް ޙާލަތު މެދުވެރިވުން ކަމަށެވެ. އެގޮތުން ފުރަތަމަ ކަމަކީ އީރާނުގެ ވެރިކަމުގެ ތެރޭގައި އެއްބަޔަކު އަނެއް ބަޔަކާ ދެކޮޅުވެ، އެތެރޭގެ ބައިބައިވުން އުފެދުމެވެ.
ދެވަނަ ކަމެއްގެ ގޮތުގައި އޭނާ ފާހަގަކުރެއްވީ، އީރާނުގެ ރައްޔިތުންގެ ފަރާތުން ސަރުކާރާ ދެކޮޅަށް ކޮންމެވެސް ކަހަލަ ބަޣާވާތެއް ނުވަތަ ވަރުގަދަ އިހުތިޖާޖެއް ފެނިގެންދިޔުމެވެ. އަދި ތިންވަނަ ލަނޑުދަނޑިއަކީ، ދެފަރާތުގެ ދެމެދުގައި އެއްބަސްވުމެއް ހަދަން ބޭނުންވާނަމަ، އެ އެއްބަސްވުމެއްގައި ފުރިހަމައަށް ދެމިތިބުމަށް އީރާނަށް މަޖުބޫރުކުރުވުން ކަމަށް ވެސް ޓްރެޜަރީ ސެކްރެޓަރީ ވަނީ ވިދާޅުވެފައެވެ.
އެމެރިކާގެ ފިޔަވަޅުތަކުގެ ސަބަބުން އީރާނުން ބޭރަށް ކުރާ ދަތުރުތަކުގެ 80 އިންސައްތައާއި 90 އިންސައްތައާ ދެމެދުގެ އަދަދެއްގެ ފްލައިޓްތައް ހުއްޓިފައިވާ ކަމަށާއި، ތެޔޮ ޓޭންކަރުތަކަށް ހަމަލާދޭ ކަމަށް ބުނި ނަމަވެސް ގިނަ ޓޭންކަރުތައް ދަތުރުކުރަނީ އާދައިގެ މަތިން ކަމަށް ބެސެންޓް ފާހަގަކުރެއްވިއެވެ.
މީގެ އިތުރުން، އީރާނަށް މާލީ އެހީތެރިކަން ފޯރުކޮށްދޭ ފަރާތްތަކުގެ ކުންފުނިތަކާއި ބޭންކް އެކައުންޓްތަކާ ދެކޮޅަށް ކޮންމެ ދުވަހަކު އަދި ކޮންމެ ހަފްތާއަކު ވެސް ފިޔަވަޅު އަޅަމުން ގެންދާނެ ކަމުގެ ވަރުގަދަ އިންޒާރެއް އޭނާ ވަނީ ދެއްވާފައެވެ.
މި ލިޔުން ކިޔާލުމުން
