އދ.ގެ އާންމު މަޖިލީހުގެ 81 ވަނަ ބައްދަލުވުމުގެ ހަވާސާގައި، ދިވެހިރާއްޖެއާއި ބެލަރޫސްއާ ދެމެދު ވިސާއާ ނުލައި ދަތުރުކުރެވޭނެ އިންތިޒާމު ހަމަޖެއްސުމުގެ މުހިންމު އެއްބަސްވުމެއްގައި ސޮއިކޮށްފިއެވެ. ނިއުޔޯކްގައި ބޭއްވުނު މި ރަސްމިއްޔާތުގައި ދިވެހި ސަރުކާރުގެ ފަރާތުން ޚާރިޖީ ވަޒީރު އިރުތިޝާމް އާދަމް ސޮއިކުރެއްވިއިރު، ބެލަރޫސް ސަރުކާރުގެ ފަރާތުން ސޮއިކުރެއްވީ އެ ޤައުމުގެ ޚާރިޖީ ވަޒީރު މެކްސިމް ރައިޒެންކޯވްއެވެ.
މި އެއްބަސްވުމުގެ ދަށުން، ދެ ޤައުމުގެ ރައްޔިތުންނަށް ވެސް 30 ދުވަހުގެ މުއްދަތަކަށް ވިސާއާ ނުލައި އެއް ޤައުމުން އަނެއް ޤައުމަށް ދަތުރުކުރެވޭނެއެވެ. އަދި އެއް އަހަރު ދުވަހުގެ ތެރޭގައި އެކި ފަހަރު މަތިން ދަތުރުކުރާ ނަމަ، ޖުމްލަ 90 ދުވަހުގެ މުއްދަތަކަށް ވިސާއާ ނުލައި ތިބެވޭނެ އިންތިޒާމު ވަނީ ހަމަޖެހިފައެވެ. މީގެ އިތުރުން ޓްރާންސިޓް ކުރާ ދަތުރުވެރިންނަށް ވެސް މި ލުއިފަސޭހަކަން ލިބިގެންދާނެއެވެ. ސޮއިކުރެއްވުމަށްފަހު، ދެ ޤައުމުގެ ޚާރިޖީ ވަޒީރުން ވަނީ ދެމެދުގައި އޮތް ގުޅުން އިތުރަށް ބަދަހިކުރުމާ ގުޅޭގޮތުން މަޝްވަރާކުރައްވާފައެވެ. ވަޒީރު އިރުތިޝާމް ވަނީ މި އެއްބަސްވުމުގެ ސަބަބުން ދެ ޤައުމުގެ ރައްޔިތުންގެ މެދުގައި އޮންނަ އިޖުތިމާއީ އަދި އިޤްތިޞާދީ ގުޅުން އިތުރަށް ހަރުދަނާވެގެންދާނެ ކަމަށް އުންމީދުކުރައްވާކަން ހާމަކުރައްވައި ބެލަރޫސްއިން ރާއްޖެއާމެދު ބާއްވާ ގާތްކަމަށް ޝުކުރު އަދާކުރައްވާފައެވެ.
މި އެއްބަސްވުމަކީ ބެލަރޫސްގެ މެޑިކަލް ޔުނިވާސިޓީތަކުގައި ތައުލީމު ހާސިލުކުރަމުންދާ 140 އަށްވުރެ ގިނަ ދިވެހި ދަރިވަރުންނަށާއި އެ ކުދިންގެ އާއިލާތަކަށް ކުރިން ދަތުރުކުރުމުގައި ދިމާވި ވިސާގެ ދަތިތަކަށް ބޮޑު ލުޔެއް ލިބިގެންދާނެ ކަމެކެވެ. މިއާއެކު، ކުރިއަށް އޮތް ފަތުރުވެރިކަމުގެ މޫސުމާ ދިމާކޮށް ބެލަރޫސްގެ ޤައުމީ އެއާލައިން "ބެލާވިއާ" އިން ރާއްޖެއަށް ސީދާ ދަތުރުތައް ފެށުމަށް ވަނީ ނިންމާފައެވެ. ނިމިދިޔަ އަހަރު ބެލަރޫސްއިން 7،443 ފަތުރުވެރިން ރާއްޖެއަށް ޒިޔާރަތްކޮށްފައިވާއިރު، މި އަހަރުގެ ފަހުކޮޅު ފަށާ ސީދާ ދަތުރުތަކާއި ވިސާގެ ލުއިތަކާއެކު، ރާއްޖެއަށް އަންނަ ފަތުރުވެރިންގެ އަދަދު އިތުރުވެ، ވިޔަފާރިއާއި ތައުލީމީ ދާއިރާއިން ދެ ޤައުމުގެ ގުޅުން އިތުރަށް ފުޅާވެގެންދާނެ ކަމަށް ސަރުކާރުން ބުނެއެވެ.
މި ލިޔުން ކިޔާލުމުން
