އިސްރާއީލުގެ ކުރިއަށް އޮތް އިންތިޚާބުގެ ކެމްޕޭނު ތަޤްރީރެއްގެ ގޮތުގައި ބޭނުންކުރާނެ ކަމަށް ބެލެވޭ ގޮތުގައި، އދ. ގެ އާންމު މަޖިލީހުގައި އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ދެއްވާ ތަޤްރީރުގައި ނިއުޔޯކްގެ މޭޔަރު ޒޮހްރާން މަމްދާނީއަށް ބަހުގެ ހަމަލާތަކެއް ދެއްވާނެ ކަމަށް ބެލެވެއެވެ.
މިފަދަ ހަމަލާއެއް ދެއްވާނެ ކަމަށް ލަފާކުރެވެނީ، ނަތަންޔާހޫއަކީ ހަނގުރާމައިގެ ކުށްވެރިއެއް ކަމަށް މަމްދާނީ ވިދާޅުވެފައިވާތީ އެކަމަށް ރައްދު ދިނުމުގެ ގޮތުންނެވެ.
އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އދ. ގެ އާންމު މަޖިލީހުގައި ތަޤްރީރު ކުރައްވާނީ އިސްރާއީލު ގަޑިން މިރޭ 9:00 ގައެވެ. ތަޤްރީރަށްފަހު ހަމަ އެދުވަހު އެނބުރި ވަޑައިގަންނަވާނެ ކަމަށް ބެލެވޭއިރު، އެމެރިކާގެ ރައީސް ޑޮނަލްޑް ޓްރަމްޕާ ނުވަތަ އެމެރިކާގެ އެއްވެސް އޮފިޝަލަކާއެކު ބައްދަލުވުމެއް ރޭވިފައެއް ނުވެއެވެ.
މި ދަތުރުފުޅުގައި އާޖެންޓީނާ، ބޮލީވިއާ، ޕެރަގުއޭ، ޕެނަމާ، އިތިއޯޕިއާ، ކޮލަމްބިއާ، ގްރީސް، ސްލޮވީނިއާ އަދި ޕަޕުއާ ނިއު ގިނީގެ އިސްވެރިންނާ ނަތަންޔާހޫ ބައްދަލުކުރައްވާނެއެވެ.
ކުރީގެ ސަފީރު މައިކަލް އޮރެން ވިދާޅުވި ގޮތުގައި، މި ތަޤްރީރު ވައްތަރުވާނީ ކެމްޕޭން ތަޤްރީރަކާއެވެ. އަދި އދ. ގެ ބަދަލުގައި އޭނާ މައިގަނޑު ގޮތެއްގައި މުޚާތަބު ކުރައްވަނީ އިސްރާއީލުގެ ރައްޔިތުންނަށެވެ.
އޮރެން އިތުރަށް ފާހަގަކުރެއްވި ގޮތުގައި، މަމްދާނީ އަދި އީރާނަށް ބަހުގެ ހަމަލާދެއްވައިގެން، ވާދަވެރި ގަދީ އެއިޒެންކޮޓަށް ވޯޓުދޭން ވިސްނާ ފަރާތްތަކުގެ ވޯޓު އޭނާއަށް ލިބިދާނެ ކަމަށް ނަތަންޔާހޫ ވިސްނަވާފާނެއެވެ.
މި ލިޔުން ކިޔާލުމުން
