މާލެއާއި ހުޅުމާލޭގެ މަގުތަކުގައި ހަރުކޮށްފައިވާ ލެޑް ސްކްރީންތަކުގެ އަލިގަދަވުމާއި ދަންވަރު ގަޑީގައި އަޑުގަދަކޮށް އިޝްތިހާރު ދައްކާ މައްސަލައިގައި އާންމުންގެ ޝަކުވާތައް ލިބެމުންދާތީ، އެފަދަ ސްކްރީންތައް ހަރުކުރުމާ ގުޅޭ ޚާއްޞަ އުސޫލެއް އެކުލަވާލުމަށް މާލެ ސިޓީ ކައުންސިލުން ނިންމައިފިއެވެ.
މާލެ ސިޓީ ކައުންސިލުގެ އާންމު ޖަލްސާއަށް މި މައްސަލަ ހުށަހެޅުއްވީ މާފަންނު ދެކުނު ދާއިރާގެ ކައުންސިލަރު އިބްރާހީމް ލަބާން ޝަރީފެވެ. އޭނާ ހުށަހެޅުއްވީ މާލޭގެ ގިނަ މަގުތަކުގައި ލެޑް ސްކްރީންތައް އިތުރުވަމުންދާތީ، އާންމުންގެ ރައްކާތެރިކަމަށްޓަކައި ސްކްރީންތަކުގެ އަލިކަމާއި ހަރުކުރެވޭ ނިޒާމު ބެލެހެއްޓޭނެ ގޮތުގެ އުސޫލެއް އެކުލަވާލުމަށް އެ މައްސަލަ ރެގިއުލޭޓަރީ ކޮމިޓީއަށް ފޮނުވުމަށެވެ.
މިކަމާ ގުޅިގެން މާލޭގެ މޭޔަރު އާދަމް އާޒިމް ވަނީ، މަގުމަތީގައި ހުންނަ ލެޑް ސްކްރީންތަކުގެ އަލިގަދަވެގެންނާއި ދަންވަރު ގަޑިތަކުގައި އަޑުގަދަކޮށް އިޝްތިހާރު ދައްކާތީ އާންމުންގެ އުނދަގޫތަކާ ގުޅޭ ޝަކުވާތައް ކައުންސިލަށް ލިބެމުންދާކަން ކަށަވަރުކޮށްދެއްވާފައެވެ. މީގެއިތުރުން، އިންފާރުތަކުގެ މަތީގައި ސްކްރީން ހަރުކުރާނަމަ ކައުންސިލުގެ ހުއްދަ ހޯދަންޖެހޭނެކަން ފާހަގަކުރައްވައި، މޭޔަރު ވަނީ ކައުންސިލަރ ލަބާންގެ ހުށަހެޅުއްވުމަށް ތާއީދުކުރައްވާފައެވެ.
މި މައްސަލަ ކޮމިޓީއަށް ފޮނުވައިގެން ޤަވާއިދެއް ނުވަތަ އުސޫލެއް ހެދުމަށް ފާސްވީ ޖަލްސާގައި ބައިވެރިވެވަޑައިގެންނެވި ހުރިހާ ކައުންސިލަރުންގެ އިއްތިފާގުންނެވެ.
މި ލިޔުން ކިޔާލުމުން
