މިއަހަރުގެ މިހާތަނަށް މޯލްޑިވްސް ޕޮލިސް ސާވިސްއަށް ސްކޭމްގެ 1,584 މައްސަލަ ހުށަހަޅާފައިވާއިރު، އެ މައްސަލަތަކުގައި އާންމުންގެ އަތުން 15 މިލިއަނަށް ވުރެ ގިނަ ރުފިޔާ ގެއްލިފައިވާ ކަމަށް ފުލުހުން ހާމަކޮށްފިއެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ފުލުހުންގެ އެންޓި ސްކޭމް ސެންޓަރުގެ ހެޑް އާދަމް ނަވީދު މައުލޫމާތު ދެއްވި ގޮތުގައި، ގެއްލުނު ފައިސާގެ ތެރެއިން 6.6 މިލިއަން ރުފިޔާ މިހާތަނަށް ވަނީ އަނބުރާ ހޯދިފައެވެ. ރާއްޖޭގައި އެންމެ އާންމުކޮށް ހިންގަނީ އޮންލައިން ވިޔަފާރީގެ ނަމުގައި ފައިސާ ހޯދާ ސްކޭމްތައް ކަމަށްވާއިރު، ރިޕޯޓުކުރި މައްސަލަތަކުގެ ތެރެއިން 821 މައްސަލައަކީ އެފަދަ ހާދިސާތަކެވެ. ދެން އެންމެ ގިނައިން ހުށަހަޅާފައިވަނީ ފައިސާ މާރުކުރުމުގެ ނަމުގައި ހިންގި 240 މައްސަލައާއި، މީހުންގެ ޝަހުސު އޮޅުވާލައިގެން ފައިސާ ހޯދުމުގެ 213 މައްސަލައެވެ.
އާދަމް ނަވީދު އިތުރަށް ފާހަގަކުރެއްވި ގޮތުގައި، މުޅިން އާ ބާވަތެއްގެ ކަންތައްތަކެއްގެ ގޮތުގައި "ބުކިން ކެންސަލޭޝަން ރީފަންޑް ސްކޭމް" ވެސް މުޖުތަމައުގެ ތެރެއިން ވަނީ ފާހަގަކުރެވިފައެވެ. އެފަދަ ފުރަތަމަ މައްސަލައާއެކު މީޑިއާތައް މެދުވެރިކޮށް އާންމުން ސަމާލުކުރުވުމުގެ މަސައްކަތް ވަނީ ކުރެވިފައެވެ. ސަރަހައްދީ ގޮތުން ބަލާއިރު މާލެ، އައްޑޫ ސިޓީ، ރ. އަތޮޅު އަދި ހދ. ކުޅުދުއްފުށިން މިފަދަ މައްސަލަތައް ރިޕޯޓުކުރާ މިންވަރު މަތިކަން ފާހަގަކުރެވިފައިވެއެވެ.
ސްކޭމްތައް ހުއްޓުވުމަށް ކުރެވޭ މަސައްކަތުގެ ތެރެއިން 2,803 އެކައުންޓެއް 48 ގަޑިއިރަށް ފްރީޒްކޮށް، އޭގެ ތެރެއިން 530 އެކައުންޓެއް ކޯޓު އަމުރެއްގެ ދަށުން އިތުރު ތިން މަސްދުވަހަށް ވަނީ ފްރީޒްކޮށްފައެވެ. މީގެއިތުރުން، މިފަދަ ނެޓްވޯކްތަކުގައި ބައިވެރިވާ 53 މީހަކު ހައްޔަރުކޮށް، 25 މައްސަލައެއް ޕްރޮސެކިއުޓާ ޖެނެރަލް އޮފީހަށް ފޮނުވައި، ހަތަރު މީހެއްގެ މައްޗަށް މިހާތަނަށް ވަނީ ދައުވާކޮށްފައެވެ. ފުލުހުން ބުނި ގޮތުގައި، ސްކޭމް ކުރާ ފަރާތްތަކަށް ބޭންކުތަކުން ފައިސާ ނެގެނީ އެކައުންޓްތައް ކުއްޔަށްދޭ މަދު ބައެއްގެ ސަބަބުންނެވެ.
މި ލިޔުން ކިޔާލުމުން
