ހޮސްޕިޓަލުގައި ފަރުވާދެމުންދިޔަ އިމިގްރޭޝަން އޮފިސަރު، ށ. ފޯކައިދޫ މަގުމަތީގެ، ޢާއިޝަތު މާހިދާ (26 އ) ނިޔާވެއްޖެއެވެ. ތިން މީހަކަށް އަނިޔާވި މި އެކްސިޑެންޓުގައި އެންމެ ބޮޑު ގެއްލުމެއް ލިބުނު މާހިދާގެ ބޮލަށް ބޮޑެތި ޒަޚަމްތަކެއް ލިބި، އެކްސިޑެންޓްވި ތަނަށް ވެއްޓުނު ގޮތަށް ހަރަކާތް ހުއްޓި ގިނަ އަދަދަކަށް ލޭ ފައިބާފައިވެއެވެ. އޭޑީކޭއަށް ގެންގޮސް ފަރުވާ ދެމުންދަނިކޮށް މާހިދާ ނިޔާވީ ހާލު އިތުރަށް ގޯސްވެގެން އިއްޔެ ހަވީރުގެ ވަގުތެއްގައެވެ. މާހިދާގެ ޖަނާޒާ އޮތީ ފަތިސް ނަމާދަށްފަހު އާސަހަރާ މިސްކިތުގައެވެ.
މިއަހަރުގެ ޖަނަވަރީ މަހު އިމިގްރޭޝަނާ ގުޅުނު މާހިދާގެ ކުއްލި ވަކިވުމާ ގުޅިގެން އެ އިދާރާއިން ވަނީ އާއިލާއަށް ތައުޒިޔާ ފޮނުވާފައެވެ. އެސިސްޓަންޓް އިމިގްރޭޝަން އޮފިސަރެއްގެ މަގާމުގައި ހުރެ މި ކުރު މުއްދަތުގެ ތެރޭގައި މާހިދާ ކޮށްދިން އިޚްލާޞްތެރި ޚިދުމަތްތަކަށް އިމިގްރޭޝަނުން ޝުކުރު އަދާކޮށްފައިވާއިރު، އޭނާގެ ވަކިވުމަކީ މުޅި މުވައްޒަފުންނާއި އެކުވެރިންނަށް ވެސް ލިބުނު ފުން ހިތާމައެއް ކަމަށް އެ އިދާރާއިން ފާހަގަކޮށްފައިވެއެވެ.
މީގެއިތުރުން، މާހިދާގެ ކުއްލި ވަކިވުމުގެ ހިތާމަވެރި ޚަބަރާއެކު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ސޯޝަލް މީޑިއާ މެދުވެރިކުރައްވައި މާހިދާގެ އާއިލާއަށް ތައުޒިޔާ ފޮނުއްވާފައެވެ. ރައީސްގެ މެސެޖުގައި، މާހިދާގެ ފާފަފުއްސަވައި ސުވަރުގޭގެ ދާއިމީ ނިއުމަތް މިންވަރުކުރެއްވުމަށާއި، މި ފުން ހިތާމައިގައި އާއިލާއަށް ކެތްތެރިކަން ދެއްވުން އެދި ދުޢާކުރައްވާފައިވެއެވެ.
މި މައްސަލައާ ގުޅިގެން ފުލުހުން ވަނީ އެކްސިޑެންޓުވި އެއް ސައިކަލު ދުއްވަން ހުރި 21 އަހަރުގެ ޒުވާނާ ކޯޓު އަމުރެއްގެ ދަށުން ހައްޔަރުކޮށްފައެވެ. އެއްގަމު އުޅަނދު ދުއްވުމުގެ ލައިސަންސް ނެތް އެ ޒުވާނާއަކީ މިއަހަރުގެ ތެރޭގައި ވެސް ލައިސަންސް ނެތި ދުއްވައިގެން ހަތަރު ފަހަރެއްގެ މަތިން ފުލުހުން ހިފަހައްޓައި ޖޫރިމަނާކޮށްފައިވާ މީހެކެވެ. ބާރު ސްޕީޑުގައި ޒިގްޒެގްކޮށް ނުރައްކާތެރިކޮށް ދުއްވާފައިވާތީއާއި، ބަންދުން ދޫކޮށްލައިފިނަމަ މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެތީ ހައްޔަރުކުރި މި ޒުވާނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ކޯޓުން ވަނީ އޭނާގެ ބަންދަށް 15 ދުވަހުގެ މުއްދަތެއް ދީފައެވެ.
މި ލިޔުން ކިޔާލުމުން
