އެއްވެސް ރަސްމީ ދަޢުވާއެއް ނުވަތަ ޝަރުޢީ އިޖުރާއާތަކާ ނުލައި އިސްރާއީލުން ހައްޔަރުކޮށްފައިވާ ފަލަސްތީނުގެ ސިއްޙީ ޚިދުމަތްތެރިން މިނިވަންކުރުމަށްޓަކައި، އިސްރާއީލާއެކު މަސައްކަތްކުރުމަށް އެމެރިކާގެ ޤާނޫނުހަދާ މަޖިލީހުގެ 41 މެންބަރަކު ސެކްރެޓަރީ އޮފް ސްޓޭޓް މާކޯ ރޫބިއޯއަށް ވަނީ ގޮވާލައްވާފައެވެ.
އެމެރިކާގެ މަންދޫބުން ކަމަށްވާ މާކް ޕޯކަން އަދި މައިކް ކުއިގްލީ އިސްނަންގަވައިގެން ފޮނުއްވި ސިޓީއެއްގައި، ފަލަސްތީނުގެ ސިއްޙީ ޚިދުމަތްތެރިން ހައްޔަރުކޮށްފައި ބޭތިއްބުމުގެ ސަބަބުން ޣައްޒާގެ ސިއްޙީ ނިޒާމަށް އިތުރު ގެއްލުން ލިބި، ހުޅަނގު އައްސޭރީގައި ސިއްޙީ ޚިދުމަތް ހޯދުމަށް ހުރަސްތައް ކުރިމަތިވަމުންދާ ކަމަށް ފާހަގަކުރައްވާފައިވެއެވެ.
މީގެއިތުރުން، އެ ސިއްޙީ ޚިދުމަތްތެރިން ބަންދުކޮށްފައި ތިބީ އެ މީހުންގެ ސިއްޙަތާއި ރައްކާތެރިކަމަށް ނުރައްކާވާ ފަދަ ނިކަމެތި ހާލަތެއްގައި ކަމަށްވެސް އެ ސިޓީގައި ވަނީ ބަޔާންކޮށްފައެވެ.
މި މައްސަލައާ ގުޅިގެން ސޯޝަލް މީޑިއާ ޕްލެޓްފޯމް އެކްސްގައި ކުރެއްވި ޕޯސްޓެއްގައި މަންދޫބު މާކް ޕޯކަން ވިދާޅުވީ، ފަލަސްތީނުގެ ސިއްޙީ ޚިދުމަތްތެރިން ބަންދުކޮށްފައި ބޭތިއްބުމަކީ "ޣައްޒާގެ މިހާރުވެސް ސުންނާފަތިވެފައިވާ ސިއްޙީ ނިޒާމަށް އިތުރު ގެއްލުން" ލިބޭ ކަމެއް ކަމަށެވެ. އަދި "ފަލަސްތީނުގެ މި ސިއްޙީ ޚިދުމަތްތެރިން މިހާރުން މިހާރަށް މިނިވަންކުރޭ!" މިފަދައިން ވެސް އޭނާ ވަނީ ގޮވާލައްވާފައެވެ.
މި ލިޔުން ކިޔާލުމުން
