ކަނޑުގެ ލޮނުގަނޑު އުފުލުމުގެ ނުރައްކަލުން ސަލާމަތްވުމަށް އޮތް ޙައްލަކީ ފަހަތަށް ޖެހުމެއް ނޫން ކަމަށާއި، އެއީ ވިލުންތެރިކަން އިތުރުކުރުންކަން ފާހަގަކުރައްވައި، އދ. ގެ ޢާންމު މަޖިލީހުގެ 81 ވަނަ ސެޝަންގެ ހަވާސާގައި ބޭއްވި "ހައި-ލެވެލް ޕްލެނަރީ މީޓިންގ އޮން އެޑްރެސިންގ ދަ އެގްޒިސްޓެންޝަލް ތުރެޓްސް ޕޯޒްޑް ބައި ސީ ލެވެލް ރައިޒް" ގައި ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް ރާއްޖޭގެ ފަރާތުން ބަޔާން އިއްވަވައިފިއެވެ.
1989 ވަނަ އަހަރު ބޭއްވި "މާލެ ޑިކްލަރޭޝަން" އިން ފެށިގެން ރާއްޖެއިން މި ކަންބޮޑުވުން ފާޅުކުރަމުންދާކަން ހަނދުމަފުޅުކޮށްއަރުވަމުން، ނައިބު ރައީސް ވިދާޅުވީ އޭރު ދިން އިންޒާރުތައް މިހާރު ކުއްލި ބޮޑު ނުރައްކަލަކަށް ވެފައިވާ ކަމަށެވެ. ކަނޑުގެ ލޮނުގަނޑު އުފުލުމުގެ ސަބަބުން ކުދި ޖަޒީރާ ޤައުމުތަކުގެ ބިނާރަށާއި އިޤްތިޞާދަށް ބޮޑެތި ހުރަސްތަކެއް ކުރިމަތިވަމުންދާތީ، މޫސުމީ ބަދަލުތަކަށް ހޭނުމަށް ބޭނުންވާ މާލީ އެހީތެރިކަން ދުރާލާ ލަފާކުރެވޭ، ފަސޭހައިން ލިބޭ، ހިލޭ އެހީގެ ގޮތުގައި އަދި ލުއި ޝަރުތުތަކާއެކު އަވަހަށް ފޯރުކޮށްދިނުމަށް އެމަނިކުފާނު ގޮވާލެއްވިއެވެ. މީގެއިތުރުން ކަނޑުގެ ލޮނުގަނޑު އުފުލޭ މިންވަރު ދެނެގަތުމަށް ޚާއްޞަ މޮނިޓަރިންގ ނިޒާމެއް ޤާއިމުކުރުމުގެ މުހިންމުކަން ވެސް ފާހަގަކުރެއްވިއެވެ.
ޤާނޫނީ ރައްކާތެރިކަމާ މެދު ވާހަކަފުޅު ދައްކަވަމުން، ކަނޑުގެ ލޮނުގަނޑު އުފުލުނު ކަމުގައިވިޔަސް، ބައިނަލްއަޤްވާމީ ޤާނޫނުތަކުގެ ދަށުން ކަނޑައަޅާފައިވާ ބޭސްލައިންތަކާއި، ކަނޑުގެ ސަރަޙައްދުތަކާއި، އަދި ދައުލަތްތަކުގެ ސިޔާދަތާއި އދ. ގެ މެންބަރުކަމުގެ ހައިސިއްޔަތަށް އެއްވެސް އުނިކަމެއް އައިސްގެން ނުވާނެ ކަމަށް ނައިބު ރައީސް ވިދާޅުވިއެވެ. އަދި ޢުމްރާނީ ވަސީލަތްތަކުން ފެށިގެން އިޤްތިޞާދީ ސިޔާސަތުތަކާ ހަމައަށް ވިލުންތެރިކަން ހިމެނުމަށް ގޮވާލައްވަމުން، ރާއްޖޭގެ ތިންވަނަ "އެންޑީސީ" ގެ ތެރެއިން މިފަދަ ފިޔަވަޅުތައް ތަންފީޒުކުރަމުންދާކަން ފާހަގަކުރައްވައި، ތަރައްޤީގެ ބައިވެރިންގެ އެހީތެރިކަމަށް އެދިވަޑައިގެންނެވިއެވެ. އެމަނިކުފާނު ބަޔާން ނިންމަވާލެއްވީ ޤައުމުތަކުން ވެފައިވާ ވަޢުދުތައް ޢަމަލީ ސިފައަށް ބަދަލުކޮށް، މުސްތަޤްބަލް ރައްކާތެރިކުރުމަށް އެކުގައި މަސައްކަތްކުރުމަށް ދުނިޔޭގެ ލީޑަރުންނަށް އިލްތިމާސްކުރައްވަމުންނެވެ.
މި ލިޔުން ކިޔާލުމުން
