ސަރުކާރުގެ ހާމަކަން ބޮޑުކަމާއި ޖަވާބުދާރީވުން އިތުރުކުރުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވެވަޑައިގެންނެވި ވަޢުދުފުޅުގެ ދަށުން، ވަޒީރުންގެ "އަހާ" ފޯރަމްގެ އައު ބައްދަލުވުމެއް ރޭގަ ބާއްވައިފިއެވެ.
ރައީސުލްޖުމްހޫރިއްޔާގެ އޮފީހާއި ޕީއެސްއެމް ގުޅިގެން ކުރިއަށްގެންދިޔަ މި ފޯރަމްގައި ބައިވެރިވެވަޑައިގެންނެވީ ޒުވާނުން ބާރުވެރިކުރުވުމާއި ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢުއާއި، މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް، އަދި ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާ ބެހޭ ވަޒީރު ޢަލީ އިޙްސާންއެވެ.
ދެ ގަޑިއިރަށް ލައިވްކޮށް ފޮނުވި މި ޕްރޮގްރާމްގައި ވަޒީރުން ވަނީ އެ ވުޒާރާތަކުގެ ފަހުގެ މަސައްކަތްތަކުގެ ތަފްސީލު ހިއްސާކުރައްވައި، އާންމުން ހުށަހެޅި ސުވާލުތަކަށް ޖަވާބުދެއްވައިފައެވެ. ސުވާލުކުރުމުގެ ފުރުސަތު ދީފައިވަނީ ފޯރަމް އޮތް ތަނަށް ހާޒިރުވެގެންނާއި "ޕީއެސްއެމް އެއަރ" އެޕް މެދުވެރިކޮށެވެ.
2024 ވަނަ އަހަރު ފެށި "އަހާ" ފޯރަމްގެ އިތުރުން، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒާ ސީދާ ސުވާލުކޮށް ޚިޔާލުފާޅުކުރުމަށް "ރައްޔިތުންގެ އަޑު" ގެ ނަމުގައިވެސް ޚާއްޞަ ސިލްސިލާ ޕްރޮގްރާމެއް ސަރުކާރުން އަންނަނީ ހިންގަމުންނެވެ.
މި ލިޔުން ކިޔާލުމުން
