އައްޑޫ ސިޓީ އާއި ފުވައްމުލަކު ސިޓީގައި ފެނަކަ ކޯޕަރޭޝަނުން ފޯރުކޮށްދެމުން އައި ފެނާއި ނަރުދަމާގެ ޚިދުމަތްތައް މާލެ ވޯޓާ އެންޑް ސުވަރޭޖް ކޮމްޕެނީ އަށް ބަދަލުކުރުމުގެ ފްރޭމްވޯކް އެއްބަސްވުމެއްގައި މިއަދު ސޮއިކޮށްފިއެވެ.
އެމްޑަބްލިޔުއެސްސީގައި ބޭއްވި ރަސްމިއްޔާތެއްގައި މި އެއްބަސްވުމުގައި އެ ކުންފުނީގެ ފަރާތުން ސޮއިކުރެއްވީ މެނޭޖިން ޑިރެކްޓަރު ޙުސައިން ފަހުމީއެވެ. އަދި ފެނަކައިގެ ފަރާތުން ސޮއިކުރެއްވީ މެނޭޖިން ޑިރެކްޓަރު މުޙައްމަދު އަފީފް ޙުސައިނެވެ.
އެމްޑަބްލިޔުއެސްސީން މަޢުލޫމާތު ދިން ގޮތުގައި، މި އެއްބަސްވުމުގެ މައިގަނޑު މަޤްޞަދަކީ ފެނާއި ނަރުދަމާގެ ޚިދުމަތްތައް މެދުނުކެނޑި، އިތުބާރުހުރި އަދި ދެފުށް ފެންނަ ހަރުދަނާ ނިޒާމެއްގެ ދަށުން ބަދަލުކުރުމެވެ. މި ބަދަލާއެކު، އޮޕަރޭޝަންތަކާއި، އިންފްރާސްޓްރަކްޗަރާއި ވަސީލަތްތަކުގެ އިތުރުން ހިނގަމުންދާ މަޝްރޫޢުތަކާއި ކަސްޓަމަރުންގެ ރެކޯޑުތަކާއި އެހެނިހެން ޒިންމާތައް ކަނޑައެޅިފައިވާ އުސޫލުތަކުގެ ތެރެއިން ޔަގީންކުރުމަށްފަހު އެމްޑަބްލިޔުއެސްސީއާ ހަވާލުކުރެވޭނެއެވެ.
ޚިދުމަތްތައް ބަދަލުކުރުމުގެ މަރުޙަލާގައި، ދެ ސިޓީގެ ރައްޔިތުންނަށް ދެވޭ ޚިދުމަތުގެ ފެންވަރު ހިފަހައްޓައި، ތަރުތީބުން މަސައްކަތްތައް ކުރިއަށްގެންދިއުމަށް އެމްޑަބްލިޔުއެސްސީ އާއި ފެނަކަ ގުޅިގެން މަސައްކަތް ކުރަމުންދާނެއެވެ.
މި ލިޔުން ކިޔާލުމުން
