ފަހި ދިރިއުޅުން ކޯޕޭރޭޝަން ގެ ފުލެޓުތަކުގެ ޔުޓިލިޓީ ބެލްކަނިތަކަށް އުސޫލާ ހިލާފަށް ބަދަލު ގެނެސްފައިވާނަމަ، އެކަންކަން ރަނގަޅުކުރުމަށް މަސް ދުވަހުގެ މުއްދަތެއް އެ ކޯޕަރޭޝަނުން ދީފިއެވެ.
އެފްޑީސީން ހާމަކުރި ގޮތުގައި، ކަނޑައަޅާފައިވާ މިންގަނޑުތަކާ އެއްގޮތަށް ބެލްކަނިތައް ބަދަލުކުރުމަށް އެދިފައިވާއިރު، އެ ކުންފުނީގެ ވެބްސައިޓުގައި އާންމުކޮށްފައިވާ ދެ ފަރުމާ ފިޔަވައި އިތުރު ގޮތަކަށް ބަދަލު ގެނައުމަކީ މަނާކަމެކެވެ. ހުއްދަ ދެވިފައިވާ ދެ ފަރުމާއަކީ "ގްރިލް އެންޑް ނެޓް ފިކްސިން" އަދި "ސްލައިޑިން ލޫވާ ފިކްސިން" އެވެ. އަންނަ މަހުގެ 28 ގެ ކުރިން މި ބަދަލުތައް އިސްލާހު ނުކޮށްފިނަމަ، ޖޫރިމަނާކޮށް ފިޔަވަޅު އަޅާނެ ކަމަށް އެ ކޯޕަރޭޝަނުން ވަނީ އިންޒާރު ދީފައެވެ.
މި ފިޔަވަޅުތައް އަޅަން ނިންމާފައިވަނީ ހުޅުމާލޭ ދެވަނަ ފިޔަވަހީގެ ފުލެޓުތަކުން ކުޑަކުދިން ވެއްޓުމުގެ ހިތާމަވެރި ހާދިސާތަކެއް ހިނގުމާ ގުޅިގެންނެވެ. އެގޮތުން، މި މަހުގެ ތިންވަނަ ދުވަހު ސްޓެލްކޯ ފުލެޓުން 2 އަހަރުގެ ކުއްޖަކު ވެއްޓި މަރުވެފައިވާއިރު، އޭގެ ކުރީ ދުވަހު އަމާން އުދަރެސް ޓަވަރަކުން 16 އަހަރުގެ ކުއްޖަކު ވެއްޓި އަނިޔާވެފައިވެއެވެ.
މި ހާދިސާތަކާ ގުޅިގެން، "އަމާން އުދަރެސް" އަދި "އަމާން ދޯދި" ޓަވަރުތަކުގައި ކުޑަކުދިންނާއި ޚާއްސަ އެހީއަށް ބޭނުންވާ ފަރާތްތައް ދިރިއުޅޭ ޔުނިޓުތައް ފާހަގަކޮށް، ރައްކާތެރިކަން ކަށަވަރުކުރުމުގެ މަސައްކަތް އެފްޑީސީގެ މެނޭޖިން ޑިރެކްޓަރު ހަމްދާން ޝަކީލް ވަނީ ފައްޓަވާފައެވެ. މީގެ އިތުރުން، ހައުސިން ޑިވެލޮޕްމަންޓް ކޯޕަރޭޝަން އިންވެސް ހުޅުމާލޭގެ ޓަވަރުތަކުގެ ކުޑަދޮރުތަކާއި ބެލްކަނީގައި ރެއިލިން ހަރުކުރުމުގެ މަސައްކަތް މިހާރު ދަނީ ކުރަމުންނެވެ.
މި ލިޔުން ކިޔާލުމުން
