މަގު ކޮނުމުގެ މަސައްކަތްތަކުގެ ތެރެއިން އިހުމާލުން ކަރަންޓު ކޭބަލްތަކަށް ގެއްލުންވެ ކަރަންޓު ކެނޑިއްޖެނަމަ، އެ މައްސަލަ ހައްލުކޮށް އަލުން ހިދުމަތް ދިނުމަށް ހޭދަވާ މުޅި ހަރަދު މަސައްކަތް ކުރި ފަރާތެއްގެ އަތުން ނެގުމަށް ސްޓެލްކޯއިން ނިންމައިފިއެވެ.
ސްޓެލްކޯއިން އާންމުކުރި ބަޔާނެއްގައި ބުނީ، މަގު ކޮނުމުގެ ތެރެއިން އެ ކުންފުނީގެ ކަރަންޓު ވިއުގައަށް ގެއްލުންވެ ހިދުމަތް މެދުކެނޑުމުގެ ސަބަބުން އާންމު ރައްޔިތުންނަށް ބޮޑެތި ތަކުލީފުތަކަކާ ކުރިމަތިލާންޖެހޭ ކަމަށެވެ. އަދި މިފަދަ ހާދިސާތައް ދުވަހުން ދުވަހަށް އިތުރުވަމުންދާތީ، މަސައްކަތްކުރާ ފަރާތްތައް ޒިންމާދާރުކުރުވުމުގެ ގޮތުން ހިނގާ ހަރަދު އެ ފަރާތްތަކުން ނެގުމަށް ނިންމީ ހިދުމަތުގެ ފެންވަރު ދެމެހެއްޓެނިވި ގޮތެއްގައި ފޯރުކޮށްދިނުމުގެ މަގުސަދުގައި ކަމަށް އެ ކުންފުނިން ފާހަގަކުރިއެވެ.
އެހެންކަމުން، މަގު ކޮނުމުގެ މަސައްކަތްތައް ކުރިއަށްގެންދާ ހުރިހާ ފަރާތްތަކުންވެސް ކަރަންޓު ވިއުގާއަށް ގެއްލުން ނުވާނެހެން ޒިންމާދާރުކަމާއެކު މަސައްކަތްތައް ރާވައިގެން ކުރިއަށް ދިއުމަށް ސްޓެލްކޯއިން ވަނީ އިލްތިމާސްކޮށްފައެވެ.
މާލެއާއި ހުޅުމާލޭގައި އިމާރާތްކުރުމަށް މަގު ކޮނުމުގެ ތެރޭގައި ކޭބަލްތަކަށް ގެއްލުންވެ، ތަކުރާރުކޮށް ކަރަންޓު ކެނޑުމުގެ މައްސަލަތައް ދަނީ ބޮޑުވަމުންނެވެ. އެގޮތުން އެންމެ ފަހުން ހުޅުމާލެއިން ކަރަންޓު ކެނޑެން ދިމާވީވެސް އިމާރާތްކުރުމުގެ މަސައްކަތަށް މަގު ކޮނުނު ބައެއްގެ އިހުމާލުން ކޭބަލްތަކަށް ގެއްލުން ލިބިގެންނެވެ.
މި ލިޔުން ކިޔާލުމުން
