ތެލާއި ގޭހުގެ ދާއިރާއިން އެއްބާރުލުން ދިނުމުގެ ދިގު މުއްދަތުގެ އޮނިގަނޑު އެއްބަސްވުމަކާ ގުޅޭގޮތުން ޢިރާޤާއި ތުރުކީވިލާތުން މަޝްވަރާތައް ފަށައިފިއެވެ. މިކަން ހާމަކޮށްފައިވަނީ ދެ ޤައުމުގެ ކަމާބެހޭ ވަޒީރުންގެ މެދުގައި ބޭއްވުނު މަތީ ފަންތީގެ ބައްދަލުވުމަކަށް ފަހުގައެވެ.
މި މަޝްވަރާތަކާ ގުޅިގެން ޢިރާޤުގެ ތެލާ ބެހޭ ވަޒީރު ބާސިމް މުޙައްމަދު ޚުޟައިރު އަދި ތުރުކީވިލާތުގެ ހަކަތައާއި ޤުދުރަތީ ވަސީލަތްތަކާ ބެހޭ ވަޒީރު އަލްޕަރސްލާން ބައިރަކްތާރު ވަނީ އަންކާރާގައި ބައްދަލުކުރައްވާފައެވެ.
ޢިރާޤާއި ތުރުކީވިލާތާ ދެމެދު ބޭއްވުނު ބައްދަލުވުމުގައި، ތެލާއި ގޭހުގެ ދާއިރާގެ އުމްރާނީ ވަސީލަތްތައް ތަރައްޤީކުރުމަށާއި، ޕެޓްރޯކެމިކަލް ސިނާޢަތް ކުރިއެރުވުމާ ގުޅޭގޮތުން ވަނީ މަޝްވަރާކޮށްފައެވެ. އަދި ހަކަތައިގެ ވިޔަފާރީގެ ދާއިރާއިން ދެ ޤައުމުގެ އެއްބާރުލުން އިތުރުކުރުމުގެ މަގުޗާޓަކާ ގުޅޭގޮތުންވެސް ފުޅާ ދާއިރާއެއްގައި ވާހަކަދެކެވުނެވެ.
މި ގުޅުން ބަދަހިކުރަން ދެ ޤައުމުން މަސައްކަތް ފަށާފައިވަނީ، ހޮރްމުޒް ކަނޑުއޮޅި ބަންދުވުމާ ގުޅިގެން ޢިރާޤުން ތެޔޮ ބޭރުކުރާ މިންވަރު 80 އިންސައްތައަށް ވުރެ ބޮޑަށް ދަށަށްގޮސް ބޮޑެތި ގޮންޖެހުންތަކެއް ކުރިމަތިވެފައިވާ ދަނޑިވަޅެއްގައެވެ.
ތެޔޮ ބޭރުކުރުމަށް ދިމާވެފައިވާ ހުރަސްތަކުން އަރައިގަތުމަށްޓަކައި، ކިރްކޫކް-ޖޭހާން ތެޔޮ ހޮޅައިގެ ޒަރީއާއިން ސާފުނުކުރާ ތެޔޮ ފޮނުވާ މިންވަރު އިތުރުކުރުމަށް ތުރުކީވިލާތުގެ ބޯޓާސް ކުންފުންޏާއި ޢިރާޤުގެ ސޯމޯ އަދި އެން.އޯ.ސީ ކުންފުންޏާ ދެމެދު އެއް އަހަރު ދުވަހުގެ އެއްބަސްވުމެއްގައި ސޮއިކޮށްފައިވެއެވެ.
މި އެއްބާރުލުމާއެކު، ދެ ސަރުކާރު ގުޅިގެން ތެލާއި، ކަރަންޓާއި، ފެނުގެ ވަސީލަތްތަކުގެ އިތުރުން އެހެނިހެން ދާއިރާތައް ހިމެނޭ ފުޅާ އޮނިގަނޑު އެއްބަސްވުމެއް ފުރިހަމަކުރުމަށް މަސައްކަތްކުރަމުންދާ ކަމަށް ޢިރާޤުގެ ބޮޑުވަޒީރު ވަނީ ވިދާޅުވެފައެވެ.
މި ލިޔުން ކިޔާލުމުން
