ހޮރްމުޒް ކަނޑުއޮޅި އެމެރިކާއިން ބަންދުކޮށްފައި އޮތް އޮތުން ވަރަށް ވަރުގަދަކޮށް ދެމިއޮތް ކަމަށާއި، ކަނޑުގެ މުހިންމު މި މަގުގައި އީރާނުން އަމަލުތައް ކުރިއަށްގެންދާ ނަމަ، ރައީސް ޑޮނަލްޑް ޓްރަމްޕަށް އެކަމާ ދެކޮޅަށް ފިޔަވަޅު އެޅުމުގެ އިޚްތިޔާރުތަކެއް އެބައޮތް ކަމަށް އެމެރިކާގެ ޑިފެންސް ސެކްރެޓަރީ ޕީޓް ހެގްސެތު ވިދާޅުވެއްޖެއެވެ.
އެސޯސިއޭޓެޑް ޕްރެސް އިން ރިޕޯޓްކޮށްފައިވާ ގޮތުގައި، ހެގްސެތު ނޫސްވެރިންނަށް މަޢުލޫމާތު ދެއްވަމުން ވިދާޅުވީ އެ ކަނޑުއޮޅީގެ ފުރިހަމަ ކޮންޓްރޯލް އޮތީ އެމެރިކާގެ ބާރުގެ ދަށުގައި ކަމަށާއި، އޭގެ ސަބަބުން ތެހެރާނަށް އެއްވެސް އެއްޗެއް ބޭރުނުކުރެވޭ ކަމަށެވެ.
ރަނގަޅު ނިންމުން ނިންމުމަށް އީރާނަށް ގޮވާލައްވަމުން ހެގްސެތު ވިދާޅުވީ، "އެމީހުން އެގޮތަށް ކަންތައް ނުކޮށްފިނަމަ، ރައީސަށް ބޭނުންވާ ހުރިހާ އިޚްތިޔާރުތަކެއް އޮންނާނީ މޭޒުމަތީގައެވެ. ނަމަވެސް މިކަންކަން ބޭކާރު ގޮތުގައި ދިގުދެމިގެން ދިޔުމަކަށް އެމަނިކުފާނު ފުރުސަތެއް ނުދެއްވާނެއެވެ. މިޝަނަކީ ކޮބައިކަން އެމަނިކުފާނަށް އެނގިވަޑައިގަންނަވައެވެ. އަދި އަމުރެއް އަތުވެއްޖެ ނަމަ އަޅުގަނޑުމެންނަށް އެކަން ކާމިޔާބު ކުރެވޭނެއެވެ."
މީގެއިތުރުން، އީރާނަށް ދުވަހަކުވެސް ނިއުކްލިއަރ ހަތިޔާރެއް ލިބުނަނުދިނުމަށް ރައީސް ޓްރަމްޕް ވަރުގަދަ އަޒުމެއް ކަނޑައަޅުއްވާފައިވާ ކަމަށާއި، އެއީ އެމެރިކާގެ މުހިންމު ޤައުމީ މަޞްލަޙަތެއް ކަމުގައި ހެގްސެތު ވަނީ އަލުން ތަކުރާރު ކުރައްވާފައެވެ.
މި ލިޔުން ކިޔާލުމުން
