ހިއުމަން ރައިޓްސް ކޮމިޝަން އޮފް ދަ މޯލްޑިވްސް ގެ މެންބަރުކަމުގެ މަގާމަށް، ހ. މީނާޒް، ޝަމްއޫން ހަމީދު ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު އައްޔަންކުރައްވައިފިއެވެ.
ރައީސުލްޖުމްހޫރިއްޔާގެ އޮފީހުގައި ބޭއްވި ޚާއްޞަ ރަސްމިއްޔާތެއްގައި، ޝަމްއޫން ހަމީދަށް މަގާމުގެ ހުވައިލައިދެއްވީ ސުޕްރީމް ކޯޓުގެ ފަނޑިޔާރު ޑރ. މުހައްމަދު އިބްރާހީމެވެ. ހުވައި ކުރެއްވުމާ ގުޅިގެން ރައީސުލްޖުމްހޫރިއްޔާ ވަނީ މަގާމުގެ ލިޔުން އޭނާއާ ހަވާލުކުރައްވާފައެވެ.
އިންސާނީ ހައްގުތަކުގެ ދާއިރާއިން ތަޖުރިބާ ހޯއްދަވާފައިވާ ޝަމްއޫން ވަނީ މީގެ ކުރިންވެސް އެޗްއާރްސީއެމްގެ އިސް މަގާމުތަކެއް ފުރުއްވާފައެވެ. އެގޮތުން 2010 އިން 2012 އަށް އެ ކޮމިޝަނުގެ އިންވެސްޓިގޭޝަން ޑިޕާޓްމަންޓުގެ ޑިރެކްޓަރުކަން އަދި 2012 އިން 2016 އަށް ސެކްރެޓަރީ ޖެނެރަލްގެ މަގާމު އޭނާ އަދާކުރެއްވިއެވެ.
މީގެ އިތުރުން ޔޫޕީއާރް ރިޕޯޓު އެކުލަވައިލުމުގައި ކޮމިޝަނުގެ ފޯކަލް ޕޮއިންޓެއްގެ ގޮތުގައި މަސައްކަތް ކުރެއްވުމުގެ އިތުރުން، ކުޑަކުދިންގެ ހައްގުތަކާއި، ހާއްސަ އެހީއަށް ބޭނުންވާ ކުދިންގެ ތައުލީމީ ފުރުސަތުތަކާ ގުޅޭގޮތުން ޤައުމީ ފެންވަރުގައި ހެދި ދިރާސާތަކުގައިވެސް އޭނާ ވަނީ އިސް ދައުރެއް އަދާކުރައްވާފައެވެ.
އެޗްއާރްސީއެމްގެ މެންބަރުކަމަށް އައްޔަންކުރެއްވުމުގެ ކުރިން ޝަމްއޫން ހުންނެވީ މިނިސްޓްރީ އޮފް ދިވެހި ލެންގުއޭޖް، ކަލްޗާ އެންޑް ހެރިޓޭޖްގެ ޕާމެނެންޓް ސެކްރެޓަރީގެ މަގާމުގައެވެ.
މި ލިޔުން ކިޔާލުމުން
