ވޯޓާސް ލިސްޓު އިސްލާހުކުރުމާއި ރަޖިސްޓްރީ ކުރުމުގެ އުސޫލުތަކާ ގުޅިގެން އުފެދިފައިވާ މައްސަލަތަކުގައި، އިންޑިއާގެ ޗީފް އިލެކްޝަން ކޮމިޝަނަރު ގްޔާނޭޝް ކުމާރު އިސްތިއުފާ ދެއްވުމަށް ގޮވާލައި އިދިކޮޅު ފަރާތްތަކުން ވަނީ ވެރިރަށުގައި ހިނގާލުމެއް ބާއްވަން ނިންމައިފައެވެ. މި ހިނގާލުމާ ގުޅިގެން ސަލާމަތީ ބާރުތަކުން ވަނީ މުހިންމު ސަރަހައްދުތަކުގައި ބެރިކޭޑް ޖަހައި، ސަތޭކައަށް ވުރެ ގިނަ އޮފިސަރުން ނެރެ، ބައެއް މަގުތައް ބަންދުކޮށް ސަލާމަތީ ފިޔަވަޅުތައް ވަރުގަދަކޮށްފައެވެ.
މި އިހުތިޖާޖުތައް އުފެދިގެން އައީ ބޮޑުވަޒީރު ނަރެންދުރަ މޯދީއާ ދެކޮޅު ޕާޓީތަކާއި މަގުބޫލު "ކޮކްރޯޗް" ޒުވާނުންގެ ހަރަކާތް ގުޅިގެންނެވެ. މީގެ މައިގަނޑު ސަބަބަކީ ކޮމިޝަނުގެ އެތެރޭގައި ޚިޔާލުތަފާތުވުންތަކެއް ހުރި ކަމަށް އިންޑިއަން އެކްސްޕްރެސް ނޫހުން ރިޕޯޓްކުރުމާ ގުޅިގެން، ކޮމިޝަނުގެ މުސްތަގިއްލުކަމާ މެދު އުފެދުނު ސުވާލުތަކާއި ކަންބޮޑުވުންތަކެވެ.
މައި އިދިކޮޅު ޕާޓީ ކޮންގްރެސް އިން އިސްނަގައިގެން ބާއްވާ މި ހިނގާލުމުގައި، އިދިކޮޅު ގާނޫނުހަދާ މަޖިލީހުގެ މެންބަރުން ބައިވެރިވެވަޑައިގަންނަވާނީ ޕާލަމެންޓުން ފެށިގެން އިލެކްޝަން ކޮމިޝަނުގެ އޮފީހާ ހަމައަށެވެ. އިދިކޮޅު ފަރާތްތަކުން ތުހުމަތު ކުރަނީ އިސްލާހުކުރި ވޯޓާސް ލިސްޓުގެ ނާޖާއިޒު ފައިދާ ނަގަނީ މޯދީއާއި ބީޖޭޕީން ކަމަށެވެ. ނަމަވެސް އިލެކްޝަންސް ކޮމިޝަނުންނާއި ބީޖޭޕީން ވަނީ މި ތުހުމަތުތައް ދޮގުކޮށްފައެވެ.
މި މައްސަލައިގައި ކޯޓުން ތަދައްޚުލުވުމަށް އެދި ހުށަހެޅުނު ގާނޫނީ ވާހަކަތައް އަޑުއެހުމަށް އިންޑިއާގެ ސުޕްރީމް ކޯޓުން ވަނީ އެއްބަސްވެފައެވެ. އަދި އިލެކްޝަންސް ކޮމިޝަނުން ވަކި ފަރާތަކަށް ޖެހި، ގާނޫނާ ޚިލާފު ނިންމުންތަކެއް ނިންމާފައިވާނަމަ އެކަމަށް ފިޔަވަޅު އަޅާނެ ކަމަށް ކޯޓުން ވަނީ ހާމަކޮށްފައެވެ.
މި ލިޔުން ކިޔާލުމުން
