ރ. ފުއްގިރި ކުއްޔަށް ދޫކުރުމުގެ މައްސަލައިގައި ކުރީގެ ރައީސް އަބްދުﷲ ޔާމީން އަބްދުލްޤައްޔޫމްގެ ހާލަތާ އެއް ހާލަތެއްގައި ހުރި އެހެން މީހަކު ނެތް ކަމަށް ދައުލަތުން ކްރިމިނަލް ކޯޓުގައި ބުނެފިއެވެ.
ދައުލަތުން މިހެން ބުނީ، ފުއްގިރި ކުއްޔަށް ދޫކުރުމުގައި ރިޝްވަތު ހިފުމާއި މަނީލޯންޑަރިންގެ ތުހުމަތުގައި ރައީސް ޔާމީންގެ މައްޗަށް ކުރާ ދައުވާގެ މިއަދުގެ އަޑުއެހުމުގައެވެ. މިއަދުގެ އަޑުއެހުމުގައި އޮތީ ހުލާސާ ބަޔާން އިއްވުމެވެ.
ޔާމީނާ މެދު ތަފާތުކޮށް ކަންކަން ކުރަމުން ގެންދާ ކަމަށް ޔާމީންގެ ފަރާތުން ތަކުރާރުކޮށް ބުނާ ވާހަކަތަކަށް ރައްދުދެއްވަމުން ދައުލަތުގެ ވަކީލު ޕަބްލިކް ޕްރޮސެކިއުޓަރު އަހުމަދު ޝަފީއު ވިދާޅުވީ، މި މައްސަލައިގައި ޔާމީން ބައިވެރިވި ގޮތް ތުހުމަތުކުރެވުނު އެހެން ފަރާތްތަކާ ތަފާތުވަނީ، ރައީސްކަމުގެ ބާރުގެ ބޭނުންކުރައްވައި ކޮރަޕްޝަނަށް މަގުފަހިކޮށްދެއްވުމުން ކަމަށެވެ.
"އެއް ހާލަތެއްގައި ތިބި ދެ މީހަކަށް ތަފާތު ގޮތަކަށް މުޢާމަލާތު ކުރުމަކީ އަދުލުވެރި ކަމެއް ނޫން. ހަޤީޤަތަކީ މި މައްސަލައިގައި ރައީސް ޔާމީންގެ ހާލަތާ އެއް ހާލަތެއްގައި ހުރި އެއްވެސް މީހެއް ނެތުން،" ވަކީލު ވިދާޅުވިއެވެ.
ފުއްގިރި މުޢާމަލާތަކީ ރައީސް ޔާމީނަށް ރިޝްވަތުގެ ފައިސާ ލިބޭނެ ގޮތަށް ހިންގާފައިވާ ކޮރަޕްޝަންގެ ސްކީމެއް ކަމަށް ޕީޖީން ތުހުމަތުކޮށްފައިވެއެވެ. މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)އާ ގުޅުންހުރި ކޮރަޕްޝަންތައް ހިންގާފައިވަނީ ރައީސް ޔާމީންގެ އިރުޝާދުގެ ދަށުން ކަމަށް ވެސް ވަކީލު ތުހުމަތުކުރެއްވިއެވެ. އޭގެ ތެރޭގައި ފުއްގިރި މުޢާމަލާތް ވެސް ހިމެނެއެވެ.
ފަތުރުވެރިކަމާ ބެހޭ ވުޒާރާގައި ކޮރަޕްޝަންގެ ތުހުމަތުތައް ފެންމަތިވަމުން ދިޔަ ނަމަވެސް، އަހުމަދު އަދީބު ފަތުރުވެރިކަމާ ބެހޭ ވަޒީރަކަށާއި ފަހުން ނައިބު ރައީސަކަށް ރައީސް ޔާމީން އައްޔަންކުރެއްވި ކަމަށް ވަކީލު ވިދާޅުވިއެވެ. ނައިބު ރައީސަކަށް އައްޔަންކުރެއްވުމަށް ފަހުވެސް ފަތުރުވެރިކަމާ ބެހޭ ވުޒާރާގެ މަސްއޫލިއްޔަތުތައް އަދީބާ ހަވާލުކުރައްވަމުން ގެންދެވި ކަމަށް ވެސް ވަކީލު ވިދާޅުވިއެވެ. މިއީ މާލީ ކަންކަމުގައި ރައީސް ޔާމީން އަދީބަށް ކުރެއްވި އިތުބާރުގެ ހެއްކެއް ކަމަށް ވަކީލު ފާހަގަކުރެއްވިއެވެ.
ފުއްގިރި ކުއްޔަށް ދޫކޮށްފައިވަނީ ވާދަވެރި ބީލަމަކާ ނުލައި، ދުބާއީގެ ކްލެސިކް ސިޓީ އައިލެންޑް ހޯލްޑިންގްސްއަށް 1.55 މިލިއަން ޑޮލަރަށެވެ. އޭގެ ކުރިން ރަށް 400،000 ޑޮލަރަށް ދޫކުރުމަށް ނިންމާފައި އޮތެވެ. އަގުގެ މި ފަރަގު ބޮޑުވެފައިވާތީ، ރައީސް ޔާމީންގެ ދިފާއީ ވަކީލުން ވަނީ އެކަން ދިފާއީ ނުކުތާއެއްގެ ގޮތުގައި ފާހަގަކޮށްފައެވެ.
ނަމަވެސް އަސްލު އިންތިޒާމަކީ ދައުލަތަށް 400،000 ޑޮލަރު ޖަމާކޮށް، ބާކީ ހުރި ބޮޑު އަދަދެއްގެ ފައިސާ ރައީސް ޔާމީނަށާއި އެމަނިކުފާނުގެ ޕާޓީއަށް ދިނުމަށް ކަމަށް ދައުލަތުން ބުނެފައިވެއެވެ. މިހާ ކުޑަ އަގެއްގައި ރަށް ލިބުމުން ޤާނޫނީ މައްސަލަތަކާ ކުރިމަތިލާން ޖެހިދާނެތީ، ކުންފުނިން ފުރަތަމަ އިންތިޒާމަށް އިޢުތިރާޟުކުރި ކަމަށް ވެސް ދައުލަތުން ބުނިއެވެ.
ރަށް 5 މިލިއަން ޑޮލަރަށް ކުއްޔަށް ދޫކުރެވިދާނެ ކަމަށާއި، އެ ކުންފުނިން ރަށް ލިބިގަތުމަށް 2.6 މިލިއަން ޑޮލަރު ޚަރަދުކުރި ކަމަށް ޕީޖީން ތުހުމަތުކޮށްފައިވެއެވެ. އޭގެ ތެރޭގައި ރައީސް ޔާމީނަށް ދިން ކަމަށް ތުހުމަތުކުރެވޭ ފައިސާ ވެސް ހިމެނޭ ކަމަށް ވަކީލު ވިދާޅުވިއެވެ. ނަމަވެސް ޔާމީންގެ ދިފާއީ ވަކީލުން ވަނީ މި ވާހަކަތަކަށް އިންކާރުކޮށްފައެވެ.
ފުއްގިރި މައްސަލައިގައި ހަ ފަރާތެއްގެ މައްޗަށް ކޮރަޕްޝަންގެ ތުހުމަތު ކުރިއެވެ. ނަމަވެސް ދައުލަތުން ދައުވާ ކުރީ ދެ މީހަކާއި ދެ ކުންފުންޏެއްގެ މައްޗަށެވެ.
"ކްރިކް" އަހުމަދު ރިޒާގެ މައްޗަށް ކުރި ރިޝްވަތު ހިފުމުގައި މެދުވެރިއަކަށް ވުމުގެ ދައުވާއާއި މަނީލޯންޑަރިންގެ ދައުވާ ދައުލަތުން ވަނީ އަނބުރާ ނަގާފައެވެ. ސަން ކޮންސްޓްރަކްޝަނާއި ސަން އިންވެސްޓްމަންޓްގެ މައްޗަށް ކުރި މަނީލޯންޑަރިންގެ ދައުވާތައް ދަށު ކޯޓުގައި ސާބިތު ނުވުމުން، ހައިކޯޓަށް އިސްތިއުނާފު ނުކުރުމަށް ވެސް ދައުލަތުން ނިންމިއެވެ. އެހެންކަމުން މި މައްސަލައިގައި މިހާރު ޝަރީއަތުގައި އޮތީ ހަމައެކަނި ރައީސް ޔާމީންގެ މައްސަލައެވެ.
މި މައްސަލައިގެ ތަހުޤީޤުގައި ސަން ކުންފުންޏެއްގައި މަސައްކަތްކުރާ ސްރީލަންކާގެ ރައްޔިތަކާއި، ކުރީގެ މޯލްޑިވިއަން ޑިމޮކްރެޓިކް އެލަޔަންސް (އެމްޑީއޭ)ގެ ނައިބު ލީޑަރު އަދި ކުރީގެ މެންބަރު އަހުމަދު މައުރޫފަށް ވެސް ތުހުމަތުކުރެވުނެވެ. ނަމަވެސް ދައުވާ ކުރުމަށް ފުދޭވަރަށް ހެކި ނެތުމުން އެމީހުންގެ މައްޗަށް ދައުވާ ނުކުރާ ކަމަށް ޕީޖީ އޮފީހުން މީގެ ކުރިން ބުނެފައިވެއެވެ.
މި ލިޔުން ކިޔާލުމުން
