މާލޭ ވިޔަފާރި ބަނދަރުގެ އޮޕަރޭޝަންތައް ތިލަފުއްޓަށް ބަދަލުކުރުމަކީ ރާއްޖޭގެ އިޤްތިޞާދު ފުޅާކޮށް، އުފެއްދުންތެރިކަން މައްޗަށް ގެންދިއުމަށް މިވަގުތު އޮތް އެންމެ މުހިންމު މަޝްރޫޢު ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ އެ މަޝްރޫޢުގެ މަސައްކަތްތައް ބައްލަވާލެއްވުމަށް މިއަދު ތިލަފުއްޓަށް ކުރެއްވި ޒިޔާރަތުގައި މީޑިއާތަކަށް ދެއްވި ބަސްދީގަތުމެއްގައެވެ. ތިލަފުއްޓަށް ވަޑައިގެންނެވި ރައީސުލްޖުމްހޫރިއްޔާއަށް މޯލްޑިވްސް ޕޯޓްސް ލިމިޓެޑް ގެ ސީއީއޯ ކެޕްޓަން ޙުސައިން ޝަފީޤު ވަނީ މަރުޙަބާ ދަންނަވައި، މަޝްރޫޢުގެ އެންމެ ފަހުގެ މަޢުލޫމާތު ހިއްސާކުރައްވާފައެވެ.
މި މަޝްރޫޢަކީ ސަރުކާރުން ޚާއްޞަ އިސްކަމެއް ދެއްވައިގެން ކުރިއަށް ގެންދަވާ ކަމެއްކަން ފާހަގަކުރައްވަމުން، މި މަސައްކަތް ސަރުކާރުގެ ކަމާބެހޭ ވުޒާރާތަކާއި ކުންފުނިތަކުގެ އިތުރުން ބޭރުގެ ފަރާތްތަކާވެސް ގުޅިގެން ވަރަށް ކާމިޔާބުކަމާއެކު ކުރިއަށްދާކަމަށް ރައީސުލްޖުމްހޫރިއްޔާ ވިދާޅުވިއެވެ. އަދި މިކަމުގައި ރެޔާއި ދުވާލު ބުރަކޮށް މަސައްކަތްކުރައްވަމުން ގެންދެވާ ހުރިހާ ބޭފުޅުންނާއި މުވައްޒަފުންގެ އަގުހުރި ޚިދުމަތް ފާހަގަކުރައްވައި އެމަނިކުފާނު ވަނީ ޝުކުރު އަދާކުރައްވާފައެވެ. ޖާގަ ބޮޑު، ވަސީލަތް ފުރިހަމަ ޕޯޓެއްގެ ގޮތުގައި އަންނަ އަހަރުގެ ނޮވެމްބަރު މަހު މާލޭ ވިޔަފާރި ބަނދަރު ތިލަފުށީގައި އޮޕަރޭޝަނަށް ގެނެވޭނެކަމުގެ ފުރިހަމަ ޔަޤީންކަން މީގެ ކުރިންވެސް އެމަނިކުފާނު ދެއްވާފައިވެއެވެ.
ތިލަފުށީގައި ކުރިއަށްދާ މަސައްކަތްތަކަށް ބަލާއިރު، އެތެރޭގެ އުޅަނދުފަހަރަށް ޚާއްޞަ ކީ-ވޯލްގެ ފުރަތަމަ 100 މީޓަރުގެ މަސައްކަތް މިހާރު ވަނީ ނިމިފައެވެ. އަދި ބިންގަނޑު އެއްވަރުކޮށް މަގުތައް ހެދުމުގެ މަސައްކަތް ކުރިއަށްދާއިރު، އެތެރޭގެ ކީ-ވޯލްގެ ހިއްކި ސަރަޙައްދު ބެކްފިލް ކުރުމުގެ 40 އިންސައްތަ މަސައްކަތް ވަނީ ނިމިފައެވެ. މީގެ އިތުރުން، ކީ-ވޯލަށް ބޭނުންވާ ޕްރީކާސްޓް ކޮންކްރީޓް ބްލޮކްތައް ސައިޓުގައި އުފެއްދުމާއި، ބޭނުންވާ މެޝިނަރީއާއި ވަސީލަތްތައް ހޯދުމުގެ މަސައްކަތް ކުރިއަށްދާކަމަށާއި، ޓާމިނަލް ޢިމާރާތްތައް އަޅާނެ ކޮންޓްރެކްޓަރަކު ހޮވުމުގެ މަސައްކަތްވެސް މިހާރު ދަނީ ހިނގަމުންނެވެ.
ތިލަފުށީގައި ޤާއިމުކުރެވޭ 60 ހެކްޓަރުގެ ޖާގައިގެ މި ބަނދަރު ހުޅުވޭއިރު، ފުރަތަމަ މަރުޙަލާގައި އަހަރަކު 390،000 ޓީ.އީ.ޔޫ. ގެ ކެޕޭސިޓީގައި ކޮންޓެއިނަރު ގެންގުޅުމުގެ ޖާގަ ލިބިގެންދާނެއެވެ. އަދި މުޅި މަޝްރޫޢު ނިމިގެންދާއިރު މި ޢަދަދު އަހަރަކު 1.8 މިލިއަން ޓީ.އީ.ޔޫ. އަށް އިތުރުކުރެވޭނެއެވެ. ބަނދަރު ހުޅުވޭއިރު ފުންމިނުގައި 14.6 މީޓަރު ހުންނަ ބައިނަލްއަޤްވާމީ ކޮންޓޭނަރު ބޯޓުފަހަރަށް ޚާއްޞަ 375 މީޓަރު ދިގު ކީ-ވޯލެއް ހުންނާނެ ކަމަށާއި، މި ކީ-ވޯލް 1.4 ކިލޯމީޓަރަށް ދިގުކުރުމުގެ ފުރުޞަތު އޮންނާނެ ކަމަށް މަޢުލޫމާތު ލިބިފައިވެއެވެ.
މި ބަނދަރުގައި ޑޮމެސްޓިކް އުޅަނދުފަހަރަށް ޚާއްޞަ 2 ކިލޯމީޓަރަށްވުރެ ދިގު ކީ-ވޯލެއްވެސް ހެދޭނެއެވެ. މި ޒަމާނީ ބަނދަރުގެ ސަބަބުން ބައިނަލްއަޤްވާމީ ކޮންޓޭނަރު ބޯޓުފަހަރުން މުދާ ބަރުކޮށް ބާލައިހެދުމަށް މިހާރު ހޭދަވާ 7 ދުވަހާއި 14 ދުވަހާ ދެމެދުގެ މުއްދަތު ގާތްގަނޑަކަށް 2 ދުވަހުގެ ކުރު ޓަރން އަރައުންޑް ޓައިމްއަކަށް ބަދަލުވެގެންދާނެއެވެ. އަދި ބަނދަރު ހުޅުވޭއިރު ޝިޕް-ޓު-ޝޯ 2 ކީ ކްރޭނާއި 1 މޮބައިލް ހާބަރ ކްރޭން ޤާއިމުކުރެވޭނެއެވެ.
މި ލިޔުން ކިޔާލުމުން
