ނުރައްކާތެރިކޮށް އުޅަނދު ދުއްވާ ފަރާތްތަކާމެދު ހަރުކަށި ފިޔަވަޅުތަކެއް އަޅަން ފަށާފައިވާކަން ހާމަކޮށް، އެފަދަ އުޅަނދުތައް 30 ދުވަހަށް ހިފަހައްޓައި، ކަނޑައެޅިފައިވާ މުއްދަތުގައި ހަވާލުނުވެއްޖެނަމަ ނައްތާލާނެ ކަމުގެ އިންޒާރު މޯލްޑިވްސް ޕޮލިސް ސަރވިސްއިން ދީފިއެވެ. ފުލުހުން ނެރުނު ބަޔާނެއްގައި ބުނީ، މަގުމަތީގައި ބިރުވެރިކަން އުފެދޭގޮތަށް ދުއްވާ ފަރާތްތަކުގެ އިތުރުން އުޅަނދުގެ ވެރިފަރާތާމެދުވެސް ފިޔަވަޅު އަޅާނެ ކަމަށެވެ. އަދި މިފަދަ އަމަލުތަކުގައި ސަރުކާރުގެ މުއައްސަސާތަކާއި ކުންފުނިތަކުގެ މުވައްޒަފުން ޝާމިލުވާނަމަ، އެ ފަރާތްތަކާމެދު އިދާރީ ފިޔަވަޅު އެޅުމަށްޓަކައި ކަމާބެހޭ މައުލޫމާތު އެ މުއައްސަސާތަކާ ހިއްސާކުރަމުންދާނެ ކަމަށްވެސް ފުލުހުން ބުންޏެވެ.
މި އަމަލުތައް ތަކުރާރުކުރާ މީހުންގެ ވަނަވަރު އާންމުކުރުމުގެ އިތުރުން، އިތުރު އިންޒާރަކާ ނުލައި އެފަދަ ފަރާތްތަކާމެދު ޖިނާއީ ތަހުގީގު ހިންގާނެ ކަމަށް ފުލުހުން ފާހަގަކުރިއެވެ. މީގެއިތުރުން، ނުރައްކާތެރިކޮށް ދުއްވާ ފަރާތްތައް ދެނެގަނެ، އެ މީހުންގެ މައުލޫމާތު ޕްރޮފައިލްކުރުމުގެ މަސައްކަތްވެސް މިހާރު ދަނީ ކުރަމުންނެވެ. އަދި އާންމުން ހިއްސާކުރާ ފޮޓޯއާއި ވީޑިއޯތަކުގެ ސައްހަކަން ކަށަވަރުކުރުމަށްފަހު ގާނޫނީ ފިޔަވަޅު އަޅަމުންދާނެ ކަމަށްވެސް ބުންޏެވެ.
ޚާއްޞަ ސަމާލުކަމެއް ދީގެން ފިޔަވަޅު އަޅާނެ ކަންތައްތަކުގެ ތެރޭގައި ޒިގްޒެގްކޮށް ދުއްވުމާއި، އުޅަނދަށް ބަދަލުގެނެސް ސައިލެންސަރު އަޑުގަދަކުރުމާއި، ހަރު ބިންމަތީގައި ގާނަމުން ދުއްވުމާއި، ދުވެލިމަތަތަކަށް މަޑުނުކޮށް ބާރަށް ދުއްވުން ހިމެނެއެވެ. މީގެއިތުރުން، ހުއްދަ ނުނަގައި ރޭސްޖެހުމާއި، ހުނަރުދެއްކުމާއި، ނުރައްކާތެރިކޮށް އޯވަޓޭކްކުރުމާއި، މަސްތުގެ ހާލަތުގައި ދުއްވުމުގެ އިތުރުން، ފުލުހުން މަޑުކުރަން އެންގުމުން މަޑުނުކޮށް ފިލަން މަސައްކަތްކުރާ ފަރާތްތަކާމެދުވެސް ފިޔަވަޅު އަޅާނެކަމަށް ފުލުހުންގެ ބަޔާނުގައި ބުނެފައިވެއެވެ.
މި ލިޔުން ކިޔާލުމުން
