އެމްޑީޕީގެ އަސާސީ ގަވާއިދަށް ބޮޑެތި އިސްލާހުތަކެއް ގެނެސް، ޕާޓީގެ ރައީސާއި ނައިބު ރައީސްގެ މަގާމު އުވާލައިފިއެވެ. މި ބަދަލުތަކާއެކު، ކުރިއަށް އޮތް ތަނުގައި އެ ޕާޓީގެ އެންމެ އިސް މަގާމެއްގެ ގޮތުގައި ހަމަޖައްސާފައިވަނީ ޗެއާޕާސަންގެ މަގާމެވެ.
މާލޭ ސިޓީ ކައުންސިލްގެ ހޯލުގައި ކުރިއަށްދިޔަ އެމްޑީޕީގެ ކޮންގްރެސްއަށް މި އިސްލާހުތައް ހުށަހެޅުއްވީ ޕާޓީގެ ކުރީގެ ޗެއާޕާސަން ފައްޔާޒް އިސްމާއީލެވެ. ލީޑަޝިޕަށް ގެނައި މި ބަދަލުގެ އިތުރުން، ޗެއާޕާސަންގެ ނައިބު ގެ މަގާމު އަލަށް އުފެއްދުމަށާއި، މިހާރުވެސް ތިބޭ އިދާރީ އަދި މާލީ ނައިބުންނާއެކު ޖުމްލަ ތިން ނައިބުން ތިބޭ ގޮތަށް ހަމަޖެއްސުމަށްވެސް ވަނީ ފާސްކޮށްފައެވެ. އަދި ޗެއާޕާސަނަށް އެހެން އެއްވެސް މަގާމެއް އަދާނުކުރެވޭ ގޮތަށްވެސް ވަނީ ހަމަޖައްސާފައެވެ.
މި ކޮންގްރެސްގައި ޕާޓީގެ ރިޔާސީ ކެންޑިޑޭޓު ތަބާވާންޖެހޭ އުސޫލުތަކެއްވެސް ވަނީ ކަނޑައަޅާފައެވެ. އެގޮތުން، ޕްރައިމަރީ ކާމިޔާބުކުރާ ފަރާތުން ސަރުކާރު އެކުލަވާލުމުގައާއި މުހިންމު ސިޔާސަތުތައް ކަނޑައެޅުމުގައި ޕާޓީގެ ލަފައާއި މަޝްވަރާ ހޯދުމަށް އެއްބަސްވުމެއްގައި ސޮއިކުރަން ޖެހޭގޮތަށް ހަމަޖެއްސިއެވެ. މީގެއިތުރުން، ޕާޓީގެ ވެރިކަމެއްގައި ރައީސުލްޖުމްހޫރިއްޔާގެ އިސް މުޝީރަކަށް ޗެއާޕާސަން އައްޔަންކުރަން ޖެހޭގޮތަށްވެސް ވަނީ ހިމަނާފައެވެ.
ފައްޔާޒް ހުށަހެޅުއްވި މި އިސްލާހުތަކުގެ އިތުރުން، ޕާޓީގެ ޕީޖީ ލީޑަރު އިބްރާހިމް ނާޒިލާއި ކުޑަހުވަދޫ ދާއިރާގެ ރައީސް ޝާތިރު އަބްދުއްރަހުމާން ހުށަހެޅުއްވި ބައެއް އިސްލާހުތައްވެސް ކޮންގްރެސްގެ އަގުލަބިއްޔަތުން ވަނީ ފާސްކޮށްފައެވެ. އޭގެ ތެރޭގައި އިންތިހާބުތަކުގައި ވޯޓުލުމުގެ ހައްގު ލިބޭ މުއްދަތު ބަދަލުކުރުމާއި، ގައުމީ މަޖިލީހުގައި ކޮންމެ ރަށަކުން އެއް މެންބަރަކު ހިމެނުން ފަދަ ކަންކަން ހިމެނެއެވެ. ޖުމްލަ 546 ވޯޓާއެކު މި ހުރިހާ އިސްލާހުތަކެއް ވަނީ ފާސްކޮށްފައެވެ.
މި ލިޔުން ކިޔާލުމުން
