ބޭންކް އޮފް މޯލްޑިވްސް ގެ އޭޓީއެމް މެދުވެރިކޮށް ނަގުދު ފައިސާގެ ގޮތުގައި މަހަކު ނެގޭ ޑޮލަރުގެ އަދަދު 3،500 ޑޮލަރަށް ލިމިޓްކޮށްފިއެވެ. ބީއެމްއެލްގެ އޭޓީއެމްތަކުން މަހެއްގެ މައްޗަށް ޑޮލަރު ނެގޭ މިންވަރު ލިމިޓްކުރި މިއީ ފުރަތަމަ ފަހަރެވެ.
މި ބަދަލާ ގުޅޭގޮތުން ބީއެމްއެލްއިން ވިދާޅުވީ، މި ލިމިޓް ގެނައި ނަމަވެސް އޭޓީއެމް ކާޑަކުން ކޮންމެ ދުވަހަކު ވެސް މީގެ ކުރިއެކޭ އެއްގޮތަށް 1،600 ޑޮލަރާ ހަމައަށް ނަގުދު ފައިސާ ނެގޭނެ ކަމަށެވެ. ނަމަވެސް، މަހެއްގެ މައްޗަށް ކަނޑައަޅާފައިވާ 3،500 ޑޮލަރުގެ ލިމިޓް ހަމަވެއްޖެނަމަ، އެ މަހެއްގައި ދެން އޭޓީއެމުން އިތުރަށް ޑޮލަރު ނުނެގޭނެއެވެ.
ބީއެމްއެލްއިން މިފަދަ ބަދަލެއް ގެނެސްފައިވަނީ ރާއްޖޭގައި ޒަމާނީ 'ޑިޖިޓަލް-ފަސްޓް' ބޭންކިންގ ޚިދުމަތްތައް ފުޅާކުރުމަށް ކުރަމުންދާ މަސައްކަތުގެ ދަށުންނެވެ. އަދި މިއީ ނަގުދު ފައިސާއަށް ބަރޯސާވާ މިންވަރު ކުޑަކޮށް، ވީހާވެސް އަވަސް، ރައްކާތެރި އަދި ލުއިފަސޭހަ ޑިޖިޓަލް މާލީ ނިޒާމެއް ކުރިއެރުވުމަށް އެ ބޭންކުން ގެންގުޅޭ ދުރުރާސްތާ ސިޔާސަތުގެ ދަށުން ނިންމާފައިވާ ނިންމުމެއް ކަމަށްވެސް އެ ބޭންކުން ފާހަގަކޮށްފައިވެއެވެ.
ނަގުދު ފައިސާ ބޭނުންކުރަން ނުޖެހި، ދުވަހުން ދުވަހަށް ބޭނުންވާ ބޭންކިންގ ޚިދުމަތްތައް ފަސޭހައިން ލިބޭނެ ޑިޖިޓަލް ވަސީލަތްތައް ޤާއިމުކުރުމަށް ބޮޑެތި އިންވެސްޓްމަންޓުތަކެއް ކޮށްފައިވާކަން ހާމަކުރަމުން ބީއެމްއެލްއިން ވަނީ މޮބައިލް އަދި އިންޓަނެޓް ބޭންކިންގ މެދުވެރިކޮށް ފައިސާ ފޮނުވުމާއި، ބިލްތަކަށް ފައިސާ ދެއްކުމުގެ އިތުރުން ވިޔަފާރިތަކުގައި ކާޑާއި ކޮންޓެކްޓްލެސްކޮށް ފައިސާ ދެއްކޭނެ ލުއިފަސޭހަ ގޮތްތައް ކަސްޓަމަރުންނަށް ލިބެން ހުންނާނެކަން ފާހަގަކޮށްފައެވެ.
މި ލިޔުން ކިޔާލުމުން
